DOBUR

                                                                                  Horish Dole:

     Dobur uisé Misinglok béttéru:né u:iko. Bím béjéya:pé tani:lok imur-siyarém ipung-gípu:sula pu:po-jarpomola du:moteika émna inam u:iko. Émdaggom mo:lég mo:léglo bím ipu:sunamdé ajjoukodaggom angngoumunsunamko kadung. Émpidaggom mé:tomla inamdé angula:ma. 

     Akon-asagé dobur gompirdok luké:dém 'do' dé donam odokké 'bur' dé  ui-otpong ila mo:písém burmonam émdag. Émpige:la ngok méngkípé dobur gompirdém édémo:pésin lutérra mékanma. Kapila émyémílo doburém mo:písém burmonam légango:ngé ipu:suma. Bím aríg-ísíng aimonamdokké ila sé:kai imur-gímuryém, ale: kané agerko germuryém, la:pang-gípa:mangkolo la:mun-gímunsuyém, piyyang agerko germuryém odo dobur uiyém ipu:sudoku.

     Nérkíkpé lumílo dobur uiyé ba:nyiko kadung. 1. Burté dobur odokké 2. Burme: dobur. Burté doburdo e:gém líkpa:dag odokké burme:né doburdo porogongkokki inadag. 

     Odokkésin ui ipu:sunamdok lula imílo doburém kéíkké atkankampé topansula:dag -

1. Mo:pun dobur

2. Ko:son dobur

3. Ra:ban ko:son dobur

4. Érang dobur

5. Atég dobur

6. Piyyang ajéng dobur

7. Opín dobur

8. Do:lung dobur  édébulu.

Dobur uidém ipu:supénamdém ka:la burta- burme:pé idag. Béjéya:pé aríg-ísíng légangé érang ako dobur iyémílo porogongkokki édém idag. 

     Doburlok líkpénam attarkídí:dé ...

Po:ro apong, e:g adorko, porog pirngoko, yumrang anné oying, pépur péle:, ruktag,  tabéng, pi:ro, kamro ékkam manggom talíng ékkam, take:, sí:pag, ambín, tabí dumpang, gitser, takpiyang ísíng agléng édémbulum.

     Doburdo uikídí:dém tobinam e:g porokkídí:dé sémpé ..

1. E:gdé yakané e:néko, édém siné mo:bobuluk léga:pé.

2. Kampon rokpo porogdé Talé: Mirémké léga:pé

3. Kampon rognédé Ko:je Yanggoké léga:pé.

4. Pobug pore:né rokpodé Karsíng Kartang manggom Tamuli Takarké léga:pé.

5. Médbuné rognédé Do:mug Dongkangké léga:pé.

     Dobursé Misinglok nérkíkpé aí opín ara:lokké lenna ibom-gíbomnam u:iko. So tulang, mosolang, saki:, dhupkati  édémbulum lígma. Lékonpé lumílo dobursé Misingém mo:píso opín ako émna léngkansumoné béttéru:né odokké ibom-gíbomna du:péru:nam u:iko. Bím ila léngkansula aíkésin rémné ilod-gílodé kasudung émna mo:píso léngkansunadung. Odokkésin lumílo dobursé Mising taniém ainé bélamém, ainé turgotko léngkandag. Kapila émyémílo tanié imur-gímuryémílo doburém ipung-gípu:supa:dakku odokké édé imur-gímurdém ami tatkolo lulensupa:dakku émna mé:la Mising tanié aima:né agerém gerkapé gídodo édé appí:dém mé:pa:langkula édé aima:né agerdém gerrangkuma. Édémpilaisong Mising tanié mo:píso sé:komsin luyo-mé:yosuma:pé aí kísapé ansíngo:pé turnam do:yingém mé:boya:dag.