NGOLU TANI:YÉ

Bhaigeswor Pogag

Ngolu Tani:yé Do:nyi  aunlok sí:sané

Abo Tani:ké obopo:lum ommangé.

Aíké gu:mín So:yiném kangkinsuné

Opín topansumapé lékola du:bosuné.

Adi:lo du:la Adi:yé émkai

Ayinglo du:la Misingé émkai.

Idogom gu:míné akampé dungkai

Agom gompirém mé:nggapsula dungkai.

Lendolo bédang atérki togbosuné

Di:té korongém lékopé ko:bosuné.

Ngolu Abo Tani:ké olungé

Sékai tokpoto sé:kai léduto.

Bédang dakor korkolo kortétto

Sé:kai mimag pamínsukolo gípansuto.

Sé:kai lédumokolo lamtém gímursuto

Dí:té korong ko:lama:la du:tétto.

Idogom ngolu Tani: opíné

Abo Tani:ké miga:né ommangé.

Adi: Misingé Tagin Galo:é

Nyising Apatani:yé takamé birrangé.

Do:nyi- Po:loké ru:nam pínamé

Tani: gí:daso Tani:rupé pínamé.

Kéra:lo lékkai su:sin lékolai

Lékopé takamé dakorém korrai.

Ayingé pésodopé Tani:yém ménggédopé

Abo Tani:ké ommangé lékobosulapé.

Do:nyimé kumlai auném pa:dopé

Po:lomé kumlai ruwadém bidopé.

Abo Tani:ké ommanga 

Kaje lérokpé lérokpé.

Do:nyi ruwad kangkinnai

Po:lo lolad makinnai.

Aying lu:urém tad-yoka sé:koté

Lérékpé du:lai Tani: takamé.