সম্পাদকীয়

 

Nébíngké Lupénam সম্পাদকীয় 

Poyirnékídí:sé Mesinmang

(শিক্ষকসকল যন্ত্ৰ নহয় )

Ohom mimo:sok migom pogokídí:dém aimonam léga:pé Ohom migomé la: kin-go pe:leyé anu anu tarungém ru:lengela poyirné ope:lok ang asiném méngkinbima:pé migom lulígnam tarungém gerparu:yé émna lupé lulígdung. Kin-go pe:leyé longé longédo anu anu lulígnam tarungém lang-ga:lok ake: Poyirné opeyé kin-go pe:le:sém lulígné pe:le émnasin lurobbomdubong.

    Poyirné ope:sém migom opeyé mesinkisapé agerém germola bulukké poyirnané a:ngém la:pagnamdém sé:kosinéi mé:líksumang. Longngéo:do ba:nyi baumko order (lulíg) biga:lok supak oko mastorésinéi ayyopé a:ng díga:la poyirlama:pé idung. Pogo:lok poyirné opeyé ngasarsulang-gémadopé bondo:né longékídí:dosin jadjad jadradné moí:rnam tarungém biga:lok a:ng díksud dígyudla gerpéya germa:péya émna gerpénampé idung. Kapilané, bulu migomlok ager gerr:sunam arré:m (salary) la:la dung. Migomé:sin kínggípé lupadung sé:kobulu migomlok ager gerra: arrém la:la: du:ji bulu migom lulígnam appíng agerém gerpayé odokké migom agomém tatpayé.

  

    Do:lu: réngamé angkir billa molennam pogo:kídí:dém silo migom opeyé la:pum la:rumsula aíké méngkampé agerém gerra dung. Migomé ainé agerko, ao: omma:lok porinam ainam léga:pé gerdung émna mé:la sé:kosin aima:pésin lumang. Poyirné opeyésin okkosin émmang. Pogo:ém la:pumsudag lédupé pogo:lok kíbígé ame:ga:lok poyirné aba:la classwise-pé poyirném biyépé émna réngamé mé:la dungai émpigela silopé édémpin tarungko ru:namko ka:pama:da.

   Private School-émyang Government School-ém aiyamonam légangé éddíkoi tarungém migomé ru:daggom édílopé classwise-pé poyirném langalígma:yeji odolopé migom pogo:lo poriné ko:ko:néngé nérkíkpé ainé kin-goyém pa:lamang.

  Poriné ko:ko:néngé la: poyirné ope:lok pogolo du:namém migom opeyé aíé kanggapsunam légangé Shiksha Setu émnam app-émsin la:lentung. Poyirné ope manggom poriné opeyé sé:kosin supakkélokké yadlangkumabong. Sé:ko pogolopé gídu:ji, sé:ko gíma:ji édé appídém supak migomé nérkíkpé Shiksha Setu app-dokki kanggabnam tarungém ru:séktung. Poyirné, poriné appí:lok attendance (du:nam) ém digital-pé la:nam légangé a:péné 3 oktubor 2023 longkílokké mimong ara:sok du:né takam Poyirné, poriné:lok pogolo du:namém bidanpayé émna kin-go mirung Dr. Ronuj Pegu-bísin bérokpé lubidung. 

   Migom lulíkkampé ipénam agerdém idanpaye émnamdémsin poyirné opeye aimang émmang émpigela poyirra du:do ayirdo aipé mé:mínsuné ko:ko:né:lok sms gíangkampé síyum siro migom ope:lok (lulíg) order-é gía:la poraina:né a:ngé yokpadag. Mobile WhatsApp-do binam lulígdém kanggela migom lulígnam agerdém geryenéi ommang porainam agerém geryen édé supak aipé ngasod agompé idung. Poyirné opeyé aíké aglíngém migomém lubisulamanggom aíké poyirné ope: ajon arumlo lukamínsula du:dag. Aropé migomé kapila poyirné kídí:sém mesinémpé badun. Pogodém ka:si mosinam, ajjoun ommangkídídok urradnamdém motumnam, kerani kisapé ager gernam, Online-lo attendance la:nam, online atí atí ager gernam, cluster meeting, celebration atí atí ager appídém mesinémpé su:k poyirné kídíngé gerpénampé idung. Odokkíddíko gernam agerdok kosto:dém sé:ko méngkinbiyén édé silok longésok poyirné ope:lokké bottaru:né taupénamko ?.

  Do:nyi longédé bondongé émna appíngéi kindag. Émpigela supak Ohom migomé do:nyi longélosin bondongé émna mé:pola do:nyi: ra:suna:né ayirko bitokumang. Do:nyi longélosin o:kai manggom o:kai moí:rnam tarung atí:ém biga:lok supak Poyirné opeyé aipé ngasod ara:lo durkelepsula du:némpé mé:supénampé idung.

  Aipé ménggappénam agomko Poyirné opeye édí longélopé bulukké asin méngkampé asin mé:pola ansí-rékío:pé poriné ko:ko:néngém poraipama:yéji odolopé migom opeye bojeko ainé ainé tarungém ru:daggom migom opeye mé:bola mala: du:nam yi:ma:dém pa:mang. Poyirné kídíngém mesinkisapé imo:mapé migom opeye bulukké lédulo tani:kisapé aya:la lupomínsugela bulum asin mé:pola porainané tarungko ru:lenbimílopak migom pogokídídok yi:mangkídídé nésin néyin jarkampé jarsaye.

Tapan Lal 

Doksiri দকচিৰি, অক্টোবৰ, ২০২৩