বীজ
ধ্ৰুৱজ্যোতি বৰা
কবিতাৰ বীজ এটি বিচাৰি ফুৰিছো
বহুদিনৰ পৰা
কবিতাৰ পথাৰ খনত গজি উঠে এতিয়া
অলাগতিয়াল এসোপামান এলান্ধু,
অপতৃণ এমুঠিমানৰ অষ্টোপচাৰ কৰি
এতিয়া বিচাৰি ফুৰিছো কবিতাৰ
কেইটামান পুৰঠ বীজ !
জীৱনৰ জটিল অংকবোৰৰ সমাধান সূত্ৰত
আউল লাগি
অনুভৱবোৰ এতিয়া পিঞ্জৰাবদ্ধ,
পাটিগণিতৰ সৰল সংখ্যাবোৰ
পঢ়াৰ দিনত
অনুভৱবোৰো আছিল বৰ সহজ
একে একে দুই
দুইৰ এক গ’ল থাকিল এক;
একে একে দুই
নে
একে একে এঘাৰ ?
এতিয়া তাকেই ভাৱি
জটিল কৰি পেলাইছো জীৱনটো।
কবি কবি ভাৱবোৰে
মোক কেতিয়াবা মাতে
কেতিয়াবা মোৰ কাষত ৰৈ
ঘুৰি পকি চাই
হয়তো ভাৱনাবোৰে বুজি উঠে
মোৰ দৈন্যতা
সহানুভূতিৰ এটি পৰশ দি
উভতিব খোজে
আৰু মই পুনৰ চটফটাও
কবিতাৰ এটি পুৰঠ বীজ বিচাৰি
Doksiri দকচিৰি, মে, ২০২৫
No comments:
Post a Comment