RU:SÉG

 RU:SÉG

       Néríng-Maladebi Borgohai

        Atsonsuné-Mg. Bhobo Dole:

         Gírgírdé dukpídoloi lomdí-lomrala Nilabí:sin sé:turdo píngkang.Gírgír dokké gíyi:né oten ao-oten omé annyidok sogéndém Nilabí alagdo sogapto. Édém ka:la Mrigangkobí anédém ludung-Nan, no otén ao-omé buluk(Babu kéla Tingkul) agerém gerbipé lagimang.Buluk agerém bulum germosuto. Nilabí aodém luto-kapila, nolu ajji:la du:dodo ngo noluk ager gerbimanganéi? Odok agomdé angudak oua.No ukum néngai, émpige:la Pritibí migom ager gerné. Bí ukum éla: gergoém akampé ka:dag.Édémpé ommang kídí:dé imílo bíkké ageré béjéma:yelang? Nilabí lulatsula:tokumamg.Angkédok inyopko mé:díré níkkepkang.Aobí kapila méngkintoman? Bulum ager gerbinam léngkanna ayangko binamko. Buluk lédulo so:mannamko.Silo silo yampo yampo ka:dung ao-yamé:sé ngolum mépagla du:namko mé:dung.Abudé ajji-arro:né agomno tadang kangang manggom Nilabí appíng agomém mé:mila mé:dag.

    Ao annyiko, yaméng annyiko odokké otén ao-omé dungge:la:sin édílai Nilabí atérdopé ansudag. TV dok remortdém langge:la" senel''kídí:dém níngkup-ní:labla du:namdok lédulo ager kamang. Mrigangko-Sosangkoké abu Doyanondo gogoibí obokorné poyirné.Mo:legdok takaméi tatgénam odokké ménggénammé. Édémpilabí bangkí bangkí agerlo du:pé idag. Édílai Nilabí milbong do:pésin aglíng sa:pé idag.Ukumdo atérpé du:né néngdoksin lutatko la:pé adí pa:mang.Bí éumpé gígo:la adí gíyoksudung. Yi:pi:nyi dítakko lékopé du:bosuge:la atéré ukumdo a:la du:lí:mang.Émpige:la milbo:dé atéré rongngapé du:nan adí pa:mang.Migom ager gerabge:la:sin asinsém "busy"la lé:pé émna ajji: ajji:ouné ko:kang pogolo gíala dung.Turnying émnam potindok tamténg abor-bornyiko mikpanpé émna mé:dung.Oko tamténgdok gombugé angkéng níngkeb du:ji.Émdaggom édé potindé éddíko pori podagan.Éddíko ma:nyingé e:la dungngan édé potindo.

   Adíkolo ukumso bí aipé du:lí:dagai.Pogolokké gílangkula ajji:ouné appun punlég lo:la oying é:torlo lo:dípé ager gerra mé:podungngai.Nilabí:sin bím ka:pa:la gímíndungngai.Nilabí gíadoloi bík nappa:do agomé bugjerpé buglendungngai.Oying-oge: dopagné ta:tebele,sela, tapad, tamiglokké lubomna gubor a:r takamlo:pé lupí:dungngai.Ajji:ouko a:ye kidag émna nappa:sém nínggapsula du:mílo taunam-lulad kébang lenka:bo.Kapila kidang? Édílokké kikan? Sang nappa:dém kokakíka? Bí "dental" daktorébo:na.

    Doyananda gogoibí TV éla: lutad pongabge:la ambug bukpé bugla agom gompag pagla:dungngai.Édé tani:dé kapila bagémpé agom-asog luma:pé gommangkan? Kapila ukumso dunga:lí:tokuman? Rongamné dungké:lo atéro:pé dungge:la Nilabí mé:dung.

      Kapila bík ao annyidé édémpé ikan ? Usa:-bosa:dolo imur-siyartoneya? Ma ikai-bakaila kin-go bitoman? Édémbulum milbo:dé mé:mang.

     Yummém yuba:dodo lulenpé émna ido, émpige:la begma:tu:man agom lula ao kídí:dok agomdém lukom lurpmdag. Ainé, aima:né agomé. Aro agomdém tolígdo.Akedém gomma:némpé du:dag.Odo milbo:dé ludag -gomma: ma:la takir medyumsula du:yo.No mé:dír mé:bomna du:la:mín ngo agom ludon.Ngo mé:dírdag.No mé:dírmang ? Buluk gílod-ilodé nok asindém kimomang ? Abí:né aodé angusupé émna malaidubong.Ajjiné aodok séu-bakor ka:dagéi.Bí ngoluk agom apirko tatmamg. Bí okolok murko: kumsung modun no kindang ? Anu bijinesko idung émdag.Okolo idu:n ? Ngo:so:lo ka:pa:man ? Ka:sílang ajjo:ko.Ngo ka:sí: mosí:pé bulu ko:ka:ma:bo odokké buluk tapong tapo:lo ngo gíla:donéi ? Aima:nammém ka:pa:yem lutumnang. Aiye, ngo luye. Su:pag yubla du:to.Abín aodok ukumdém mopínéiyebong.Mopínmíloi lu:jarpé bí gíyebong. Oten ao annyidém gípagbomílo ngolu kapé du:yen ? Bulu méngkindu:song ? Méngkindaggom nom bulu mébimang. Édémpé luto ? Mé:yo.Ngo lo:dípé nok kéra:lo du:ye.Bulu oma:dolosin ngonnyo dungngamalang.Sémyang aiya:pé.Édé adídok agomdé angudag.Su:pag ngolu miné-míjíngé.Ngolum takam adíloi bulu mosíyai.Ngok kíddín ya:meko du:doso okko mé:pénam du:n? Koyemna yirkang. Mé:pal du:dolokké ngonyi mépansumang.Gergo agerlok édílai guwahati gímílo asinsé rongngamdungai. 

        Doyananda gogoibí lukang -Aro agomé. Lo:nyi légango:pé gídaggom asin du:pomangai.Míbo agomém béjéko luyartobo. Su:pag yuptobo.

     Rokondo rokompé darobla ursu-lasuge:la Nilobí apin-oying yingkopé gíkang. Ao-yaméng, otén ao-omé léga:pé portang molento.Po:pé Minangko bí:la Sosangkobí portangém aipé mé:dagai.Émpila buluk dolínamko mobidag. 

     Rokomdo porta binamdém ka:la yamé:dé lukang-nan, no sémpé lo:dípé porta bitíla du:mílo bulu" Overwheat "iyé.So bulu aipé "celori" kadag.Odokki ngoluk ékér léga:pésin aimang.Anédé lupé émna méngge:la:sin lutomang.Dabalok dogo:nam kídí:dé ainé" celori"kannéi.Anédok agom luma:pé du:namdém ka:la ao Mrinangko bí lukang- Nan, no aima:pé mé:yo.Leke ké longngé kama:bong.Silo-mélo appíng tani:é aíké ékér léga:pé kinsudag.Siyum-sí:ro tani: ili-ikampé turdag.Lékoda Mrinangkobí anédém luyirdung.Nilobí mé:dung- mé:nam-mé:mang(bhav anubhuti) ainam aimag ém ili-ilodé pakommílo turnam turnyilok aré du:lang? 

Aíkolopé bí aipé mé:latsukangku.Lomdí-lomrala ager gernam, bulukkolok ayang ajjouko manam, gerdumsunamko, mé:dumsunamko édébulu buluk pinyodo a:mang.Ayang nosordé okolai pabbé gédung. TV lok kartun ka:namdé otén bulu menyogdung.Donam léga:pé luyum luyumna tatpodanné gomukki gognam agomdo bí lébíng kinamé yokpagdungngai.Mrinangko kéla Sosangkoké ko:kang adídém mé:pangkangku.Pogo bomnam sogén mosí:binam, yupko-dongko mosí:binam ager kídí:dé agerréi ? Ajjiouko adí monyoksunanémín ? Yamé:dé kapila méngkinman? Otén buluk lédulo du:mínnamdé bulum éddíko mé:po modang ? 

  Agom kídí:dém mé:la mé:la du:dolo Mrinangko buluk gíkunammém aíéi kinsoitomang.Oddar gírgír bé:namko tatpa:to.Sosangko bí:la bík atai Rajbí sé:tur moge:la gíadungku.Bínyim tetmoge:la ara:pé gíangkangku.Nilobí mé:to aosé apin dokakupé gídungku.Édémpila lomdí-lomrala sang bige:la luto. Nonyi tetpo:to.Ngo donanéko bakéréppo:pé.Sosangkobí anédém sobomna lukang-Ngo apin dokapé ukumso:pé gíkumang.Murkong ajjouko lagidung.Éddíko lagidang ? "20 thousand"ko. Éddín murko:dém okolok pa:yen ? Abudok penson murko:dé po:lo dokképé pí:dagong.Abín ao dém kapé ukumsém solaimoyen ? Kaidok la:to.Ngo bíkkolok murko: kola:mang.Nokkolok sillom kodu:n, édémgom bila:mang.Anédé oikai lumango:dapé Sosangkobí lukang-Pokainé tani:lo okol murko: du:yen ? Kin-go éla: luli: - lukam lukaikoloi longngé gíkang.Ainé murko: béjék la:nam atta:rko gékítomang, Ainé kolejlo porimotomang odokkésin ai ainé donamko dopa:tomang.Kaibí ma:mokokki basikang.Ngokké murko: dung. Silo "bank" mokomna:mín kodun ? Murko: béjéko lagila:mín kopo:du:n.Kamam kama:néna, nokkolo adí monyoksula aré kamang.Sosangkobí aglíng lí:la anédok kéra:dok gíkangku.Nilabí aodo:pé mé:dírla ka:mínna dungkang.Édílo amik pirnyisok miksi pédong oka:song kinsoitomang. 

     Bagémpé ukum arangngolokké Dr.Bhupen Hajorilaké to:rí rí:la monam ni:tomdé kinsimotoku.Édé adído Nila bí:la milbongodé dungngai.Kínggí:pé bé:dopé se:ko ni:tomsém etlíkton ? Ka:na:mé milbo:dé manna dung.Nilabí ajji:ko bé:namdém komaito. Edmabdannamé milbo:dé ludung-bé:dopé etlíkto. Silo ngo mo:rongngolokké dénga:né gombugém tadlí:mang.Ngo ngok turkampé turrí:dag.Ngom turmotei.Nilabí méngkinto Sosangkoké lunam gomugdé milbo:dok mittugdok randung. Édé adído Doyanandoké poyirné ajon Tiluson Dattobí gíado. Nilabí airu:pé aipé méngkang.Bínyi ainé-aimang do:nyingko kípomínsuye. Sosangkoké léga:pé ké:nam oying-apindém annyidém bito.Mé:podanna aki: bidopé doge:la yumdéng ayirdo gílenkang. 

          Yumdéng appi: díbígdo Mrinangkoké gírgírdé sé:turdo dugrasunamdém ka:la Nilabí gílenkang. Mrinangkobí atér gík bookunam ka:la asoritla taddung-Tiklu, Babu odokké yamé:bí okolop gíkan? Anu ukumdo du:ye ngolu oua.Ukumdém gingama:pé kapé otén omé-ao bulum du:boyen? Silo nok yamé:dok ané-abudé bamun gíbola uyu mobika.A:péné po:lodo aiyo:pé ukum gingang iyeku.Rum ba:nyiko mopíntagbong. Mé:pénam kamang.Nok ba:bum lupa:sula gímam aiyelang? Ba:bubí kinnam-kinmang agomdo oko lukéng du:n? Bí édílo ngolum ainé bélamko léngkantun? Béjéko bila:manggom laginamdém bila dung. Su:paksin nolum ukum bomna dodopé tolígma:da.Ngoluk ukum bomna donam dayitya bí la:pé lagima:bo.Abu kísapé bí ngolum béjérungko ka:sípénam dungkang.Édé agom kídí:dokké lukéng kamang.Édém métobo. Ngo bédu-gasor abor-bornyiko langkakupé gídungku.pagmílo do:nyi longédo Priti bulum gíboyeku.No mé:dírla du:yoka.Nilabí ílíng gégabnam pékípé dungkang.Mrinangkobí pítan sogénlo bi:dopé bédu-gasor dunge:la gílendoku. Nilaké angké:do mé:dír-kablíngé níngkebbomkang. Émdaggom aodém ludung-Apinouko doge:la gílangku ame:ya.Ngokké adí kamang oua, Donam-tí:nam atta:r répénam dungngeida.Nilaké agom lukkoi katomang. 

     Yuméka:bong.Odosin milbo:dé gíangkuma:da.Nilaké mé:díré a:dungai.Émdodo sé:turdo gírgír du:tetka:némpé anna mo:ro:pé gílendung.Angkéngé aipé pokkang.Ma: bí:mang.Sosangkobí ajonko gíbola gíadungku.Nilabí milbo:dém kangkolo sé:tur turkolo:pé gípíngkang.Konang kíbíkka:bong.Asinbé pokkídung. Okolai kapéi..... Ma: Nilabí édém mé:lamang.Siddí adíko bí édílosin du:lamang? Yumdé:loi gíalangkula Nilamé idum-irumsudakku. 

    Anédém ukumdo pa:ma:la kanggo:nammé sé:tur kéra:do du:tedla dung.Sosangkobí anédok kéra:pé píngkang.Asídoukko gísa:la anédok lumangodapé Sosangkobí lupéya-luge:ma:ya émna anédém ludung- kapikan nokké? So kapila sémpé dagla du:n ? Nilabí ngarasulangkula ludung-Yumdéng ayirdo:bo nok ba:budé Dottoké lédulo gílenkang.Su:paksin gíangkumang.Anédok agomdém tadla Sosangkobí aglíng sa:dung odokké ludung-émpila:tu ngo ukumso:pé gíkuman? Longé-lo:bung ager gerge:la su:pag bím mala gípé ikangéibo. Okol siyen simoto. Ngo mala:mang.Ukumlo:pé adílo gílatkuma:né tani:é turla okkom iyen? Ngo donamém bomtakku.Sa:ng kap annyiko kirge:la ngok rumdok réjongdo lé:bilang odokké Jitbí siyum du:ye.Apin-oying lomna yi:lang.krisdé ajiném lé:tung.Sosangkoké lunam agom apirko Nilaké pinnyodo a:tomang.Lamté:do ajji ajjoupé agom luposunam tatpa:la asídouko gíla ka:namé Dotto bí:la abudé. Gídoku ayirdo dottobí ludung- pagmílo yampo lengorlang. A:né ru:yingolok ainé ésarko medla:pé.Aiye, gípongkangkubo. 

Doyanondobí sé:turdo né:dém ka:pa:la ludung-kapikan ai ? No siddíko yumépé du:pa:donéi ? Agom lupo luposula gíddom khagorijan pí:to.Nolinibí ka:pa:la goga:bomtoku.Anédé donam-tí:nam bidoloi yumékang. Aipé ainé ko:kai.Bí migom agerkosin pa:to.Gogoi mastordé nok alagdo gupod gupodla du:né akunko bitung.Sé o:ko du:n? Nok aipé mé:nam atta:rko.Kai,sangko kirtok, po:pé kapé annye tedbosuge:la tí:dungaji: édémí:pé tí:lai. Aiyé, no alé-alakko supo:ta:.Lupénamsém mitpandung-abí:né ao bulu buluk anu ukumdo du:yebo.Ngo kintobo. Jitenbí lubidagai.Bí ukumso:pé gídokudo ríksuto. Mé:yo, nok lédulo ngo du:ma:lang.Éddíko ma:nyingém ngolu ma:tungan? Ma:nyi:dé ma:nyi:pé dungkang. Araipé Doyanondobí sagíko gíkang.Bagémpé kínggí:sula pakkín ya:mepé lukang-ngo lékoda mé:dírma:bo.Nilabí milbo:dok agomdém tadla lukang-no okkom ludu:n? Ngo tatkinmang.No po:píngkémpé makkori:la dung.Su:pakké érang ngasod-ngayodém no to:pí:mang.Airungkang, ékímam no:sin aipé ngasod pa:yai.Turnyiso dé:gem matungai. Buluk léga:pé turnamsém tosaktagai. Mélopé buluk mé:bomnam atta:rém sogén bi:dopé bomtungakui.Émdaggom mé:tísumola:tomang.Ngo silo porajito.Émpige:la ngolong ommang léga:pé mé:pomang émna mé:yo.Ngolukkémpin ané-abbo béjérungko mé:po poma:né dung. Appí:do asin agomém lé:sila-mo:ro:do ako, ara:do akopé ila dung. Dottoké aodé ami: mo:rumlo gíge:la gílatkumanamdém kindagéi.Omédé Okomsok mo:tépé pori lí:dagai.Murko: moninbila:ma:la poritomang. Mélo, ané-abudém tani:mang émna luto. Épige:la:sin ané-abudé yirla yirla turla dung.Bulu kapé yirla yirla turla du:ji ngolusin turkílai.Ngolugí:ké turkampé íyingko érangé turla dung. Nok kéla ngokké aíké mé:poko kama:néi? Ngoluk turnamsé ommang légangopéi? Apod-podmílo kumrí-ko:ré ka:yepéyam.Ngolusin bulum ka:dung.Sa:, apin-oying yi:ta:bo.Mibo ko: kosin du:ma:lang.Yampokolokké édílai édílai nomsin gígo:boye.Ngo po:píng kémpé ukumso durbutsula du:ya:mílo arodém édílosin kinpí la:ma:ya:pé? 

............. ................................................ 

Asomiya protidin "Deuboriya Sombar" 2 disembor/ 2018 dok Maladebi Borgohaiké "সিদ্ধান্ত "

émnam do:déngdém Mising lo:pé atsonsunamé.