JAWAHAR NAVODAYA VIDYALAYA DÉ OPANKÉ POGO KIN-GO LÉGAPÉ

 JAWAHAR NAVODAYA VIDYALAYA DÉ OPANKÉ POGO KIN-GO LÉGAPÉ

Bhaigeswor Pogag

Jawahar Navodaya Vidyalaya dém Bharot migomé National Policy of Education 1986 do do:lung odokké opanné Tani: kídarké ommang kídardém poraila:dopé Bharot migomé molentung.Bharot mo:rumso 28 ko state lo:lang 8 ko union Territories-lo 661 ko Jawahar Navodaya Vidyalaya iskulé dung.Tamilnadu mimo:dém mégela Bharot mo:rumsok mo:dum takamlo JNV ako du:dag.Navodaya Vidyalaya Samiti sém Bharot migomé autonomus organization pé tolíktung.Bulu aísupé pogo kin-goém poraibomla dung.Sé Bharot mo:rumsok aiyapagné pogo kin-go pé tadgédag.Sé do:lung arang ara:lok raddopé pori kinné ko: ko:néng kídarém bottépé porilado:pé émna molenam pogo kin-golok mé:nggésunam kébangko. Navodaya iskullo poripé Jawahar Navodaya Vidyala Selection Test( JNVST)ko bipa:dag.Édé anka:dém bipé lékor -V do porila du:né kídaré forms dém online manggom offline ki fill-up pa:dag.Bí anka:do pa:j mílo lékor -VI do JNV lo a:yeku.Lékor-9 dok légapé lékor-8 do porila du:né ko: ko:néng kídaré anka: légapé forms fill up pa:ye.Lékor-11 dok légapé anka: bipé lagimang.Lékor-10 dok pa:nam nombordokki merit basis ki selection idag.Odok légapé sim-si:ro online ki forms fill up pa:dag.Lékor-6 dok anka: bidolo,English,Hindi,Malayam,Mizo,Sindhi,Telegu,Kannada,Oriya,Urdu,Gujarati,Marathi,Panjabi,TamilAssamese,Bodo,Nepali,Monipuri,Bengali,Khasi odokké Garo agom kídardok akomumko mediampé la:la bila:dag.Ko:dé manggom ko:nédé J.N.V.S.T anka:lo pas:mílo Navodaya-lo a:dokudolo English medium pé North-East state kídarso poraidakku.

Édé anka:dém bipé oko oko document ém lagiyen émmílo kéíkké kagoj kídarbém lagiye.

1. Du:téng kangkinsunané sartiphiket(Residence Certificate)

2. Onané sartiphiket (Birth certificate) sém forms fill up dagém lagidag.

3. Pass port photo ako.Sém forms fill up dagém lagidag.

4. Cast Certificate(SC,ST&OBC) légapé.General category lok pa:sné kídarké légapé édém bulum lagimang.Sém pa:sdag me:lamdo lagidakku.

5. School certificate kídardém me:lampé lgidakku. 

Jawahar Navodaya Vidyalaya lo porinam légapé du:téng dakténgém ka:la lé:si:la(reservation) lé:binamkosin dung.Lédu mokutsuné ope: odokké do:lu:lo du:né kídarké légapé 75% ko do:lung ara:lo du:né iskul kídarké légapé lé:sibidag.25% ko lu:jarlok iskullo poriné lang appíngé bila:dopé mo:rope lé:bidag. Scheduled Cast légapé 15% ko, Scheduled Tribe légapé 7% ko lé:si:bidag. Scheduled Cast lang Scheduled Tribe dém kípumsula 50% dok bojeyapé angupé lé:si:bilamang.Lébé-lagbe:né odokké begmané kídarké légapé 3% kopé lé:sibidopé dung.

Do:lung kutadok poripéné kídardé iskul akkolo lékor-3,lékor-4 lang lékor -5 dém Government /Government recognized migom iskul manggom migom tolíknam aíé mosunam do:lung iskullo poriné ipaye odokké Jawahar Navodaya Vidyalaya dungko mo:dum ara:do poripaye.Lukanko-Ko: dé manggom ko:nédé oko mo:dumlo poriduji édé mo:dumdo du:né Jawahar Navodaya Vidyalayado bí JNVST anka:dém bilaye.Open school lo porila pa:sné kídarégom Jawahar Navodyay Vidyalaya lo poriladag.  

Jawahar Navodaya Vidyalaya lo porinané agompé ané agom manggom mongke: dok agomki odokké English ki lékor -VIII do:pé poraidag.Odok me:lamdokké English,Maths,Science,Social Science odokké Hindi ém lékor -X dokké Lékor -XII do ankangém Central Board of Secondar Education é la:dag.Jawahar Navodaya Vidyalay lo donam-tí:nam,Génam uniforms,létag-léyug,adnané bohi,ponané pogo potin kídardém abar apirkosin la:mapé migomé bidag.Sim sí:ro Murkong 600/=ko lékor -IX dokké lékor-XII do:pé bipa:dag.Édém corpus fund émna ludag.Migom ager gerné kídarké ommang kídarkélok po:lolo murkong 1500/=ko la:dag. Scheduled Cast lang Scheduled Tribe,Mimé ko;néng ru:bey,lébe-lagbe:né odokké opanné kídaré édé murkong kidardém bipé lagimang.

Jawahar Navodaya Vidyalaya é oko légapé murkong pilla Bharot mo:rumso agerém gerdun émna taumílo kéíkké lukannam do:ying kídarbém kinpénamé.

1.Ainé kin-go pogo ponam,Anu pogo ponam,Dírbí dírlabé mosi:nam odokké ko:kangém kinpopé kinmonam,Amír ékér mosi:sula larmonam,Ésing-Élíng mosi:nam odokké do:lung ara:lo du:né tukku radné ommang kídardém ainé lamté léngkannam agerém Jawahar Navodaya Vidyalaya é gerdag.

2.Ko:kangé buluké rémakpé kinnado:pé, buluké luposunané agom odokké atponé agomki agom ba:umki poraidag.Asom,Nagalend lang Orunasol mi:mong kídarso English,Hindi,Assamese lang Bodo agomki Jawahar Navodaya Vidyalay é poné kídardém poraidag.Monipurlo English,Hindi lang Monipuri ki poraidag.Tripuralo English ,Hindi lang Benggoli ki poraidag.Mijuram lang Meghalaya odokké Sikkimlo buluké ané agom Khasi,Garo,Miju lang Nepali lédulo English lang Hindi é poraidag.

3.Ko: ko:néng kídarém ainé poyirné mastorkokki poradopé migomé ainé ainé pogo kinném ba:yugla la:dag.JNV lo ainé ainé ngi:tom do:yingki ko: ko:néng kídarém inom gínom bodag.

4.JNV iskullo ko:kangém síngkí 11 dokké dítag 19 né ommangém ainé tanipé monam légapé poribodag.

5.Jawaha Navodaya Vidyalaya lok anka:lo 100 ko noborém bidag.

1.Mental ability test 50 taunamé odok nomborésin 50 ko.

2.Arithmetic test 25 ko taunamé odok nomborésin 25 ko

3.Language test 25 ko taunamé odok nomborésin 25 ko.

Bharot mo:rumso su:paglo:pé 28 state odokké 8 union territories lo 661 ko Jwahar Navodaya Vidyalaya é iskulé dung.JNV akolo 5 Acres dokké 20 Acres ko amo:ngém lagidag.Édé amo:dém mimong dok migomé émmumpé Jawahar Navodaya Vidyalaya ém bidag.Émpila Jawahar Navodaya Vidyalaya kídarsé do:lung ara:lo du:dag.

Jawahar Navodaya Vidyalaya si ngolukémpiné opanné réngamsok légapé aipé aidag.Lékor-6 odokké lékor-12 do:pé atí murkong ngasod kamapé ommangém poraila:dag.Émpila ngo ngokké Mising ané-abu biro-bírmé nolum ludung ommangém JNV lo poraiye émna mé:langka.JNV lo yampo ro: lékor-12 dém pa:jge:la okkom porimílo aidagji,Kapé poripé lagidagng appídém aiyompé lukai pokaidag.JNV lo ko: ko:néng kídarké porinam lédu lédulo ,Yoga,Sport,Music,Acting appíngém mokai lukaidag.Science, Commers lang Humanities émna kosag ba:umko JNV lo dung.ko: ko:néng kídardé okodém porilí:dagji édémpéi poriladag.Okumlokké atí abar murkongém porainapé JNV lo bibegmang.Génam-Bomnam,Donam-Tí:nam,Létag-Léyug,Sabon-Tulang appídém Bharot sorkaré bidag.Pétom omma:ng kídardé aipé poribipé lagidung.

Sinnyingké pogo-kin-go dítag 2020-2021 ara:sok yí:manglo Mising ommangé Navodaya Vidyalaya lo sémpé Pas:tung-1.Kéíg Dibang Bheli (Arunachal)lo 80 dok 6 ko Mising ommangé pa:tung,2.Lohit /Namsai (Arunachal)lo 80 dok 9 ko pa:tung, 3.Sanggo Siang(Arunachal) lo 40 dok 1 ko, 4.Sunitpur (Asom) lo 80 dok 4 ko pa:tung, 5.Sibsagor(Asom)lo 80 dok 2 ko Mising ommangé pa:tung, 6.Jorhat (Asom)lo 80 dok 15 ko, 7.Dibrugarh(Asom) lo 80 dok 3 ko, 8.Tinsukia(Asom) lo 80 dok 9 ko pa:tung,10. North Lakhimpur(Asom)lo 80 dok 19 ko Mising ommangé pa:tung odokké 11. Dhemaji(Démaji) lo 80 dok 19 ko Mising ommangé pa:tung.   

 A:péné pogo kin-go 2021-22 dítaksok légapé online forms ém fill up du:bo.Lékor-6 légapé online register ém Mising ko: ko:néng kídarké légapé TMPK é asutko igurbolangka émna lupa:dung.Do:lu:lo du:né ané abu bulu édém bulum bérokpé kinmang.Online forms ém iropkabo.Sém longkí 30.11.21 do:pé ilaye.Anka:dém angkupéné 30.04.2022 (Epril po:lo) longé la:ye.Mising réngamké ommang kídarém JNV légapé forms fill up bém kapégom ilangka émna lupa:dung.Yampo ro:ye opandaggom ngoluké ommang kídardé tura-garasulayepé. www.nvshg.org do níngka:la ka:mílo appíngém pa:ye.