Érang Lékola Du:laika

 ÉRANG LÉKOLA DU:LAIKA

                                           Raju Kumar Narah

Lakhimpur

     

                                                      

Lékonam agomdé appíng ager gernamloi ainé agomé. Leke lokkébo tani: réngamlo biro-bírmang lékola okum kumdangém da:la ainé aimang kangkinla lékomínsula mé:po-mínsula du:dungai. Odokké akon-akon érangé kumrí-ko:rípé mé:nying-ka:nying-mínsumapé domín tí:mínsula, ainí-aimang appíngém ka:mín-mamínsula mé:po-ménganna du:dungai. Édémí:pé appíng érangé lékomínsula du:dungai, édém do:lung émna ludugai. Édé do:ludo duné appíng tani:lok asinlo aya:mínsunamko kadungai. Sékkéi donam kama:mílo bimínsudungai, sékkéi ramnam-kinam a:yemílo ka:mín-tadmínsudungai. Édémpé anguma:pé aya:mínsula du:namki do:lu:dok appíng éra:dok okuméi aipé arai-araila gídungai. Aríg ísíngémsin lékopé gerdungai. Odolo érang ako:dok tani:é agerém gerpílla:ma:nam, daglíg gerdumsunam légangé do:lung appíngé agerém gerdumsudungai édém ‘Mainong’ manggom ‘Rígbo’ émna ludungai. Rígbo ager daglígém do:lung réngamlo, akon-akon réngamlo aya:mínsunamkosin kadungai. Édémpé biro-bírmang ayamínsula lékola du:namki okum érang ako:déi aipí araidungai. Okum kídí:dém tunggé:dokké ko:ktogdopé gíla gípíla:mangai. Odokké éra:dokké tani:ésin aipé bojédungai. Éraddoké tani:bojébadnam dokki apin kotugém sakkolo sakpísulamapé idungai. Édempé donam-tí:namém mopí-ipí:sula:ma:namki biro-bírmangé kangkono:pé luposula okumém gi:pan-mopansudungai. Édém ‘angusunam’ émdungai. Édémpé angosuyemílo éra:dok biro-bírmang appídé kangkano:pé lupomínsula aríg ísíngém, okum-kumsungém orpan mopansudungai. Aso-aso:pé ayiré angu-angula gínamki tani: du:lod-daglodé, dolod-tílodé angu-angula gínamém kabekkang. Sé do:ng amo:so kapé aso-aso:pé tani:é bojé-bojéla gídu:ji aríg amongé, donam-tí:namésin pí:tu pí:ramna gíbomdung. Dokké:sin tani:kídí:sokké asiné:sin andéng-andéla gínamém ka:pa:dung, ayang mínsunamé:sin kamapé idung. Agerém ménggab kanggabla gerné kama:dung. Asin kídí:dé:sin méngki-kangkimínsula akon-ako:ném lumín-pamínsunamém ka:pa:dung. Lupé lumílo aíké biro-bírmang ara:doi aipé kangkimínsula lékomínsula du:namé kama:pé idung. Ané-abu lédulo lékola mé:po-mínsula du:namém ka:pa:tokuma:bo. Yamné-la:míloi atérpé angusula du:namém méngamka:bo. Mé:mi:yémíloi réngamsok tani:asin kídí:déi naréma:pé idubong. Kapéné émyémílo sékkai érangé lékomínsula ayamínsul dunggom, do:lungí:dok tani:é bulum luilubarrgíla méngki-kangkimínsomla an angumínsuam modag. Dokké:sin sé:kai-sé:kai ami luurki angusudung, sé:kai lukapaka:mínsula angusudung. Édé appí:dé buluk asin apídok ayang-abo kama:nam-dokki idung. Édé réngamsok aipé aima:né uyupé idung. Dé uyudém ngolu du:yarmomílo lédu-lamkupé réngam émnamkosin ka:pa:ma:ye. Émpila réngamsém aya:mínsula du:monam légangé mé:mílo okum éra:dok biro-bírmangé aya:mínsunamko kapa:ye. Dokké buluk ao-ommangémsin aya:mínsunamém léngkan-ikanpa:ye. Odok lédupésin akon-akon do:lulo gímín du:mínsunamé:sin kapa:ye. Édé appí:démpé aya:mínsula du:mi:lo:pak érang lékola du:yé, ainé do:lu:pé iyé, tani:réngamsé turyaryé odokké asin ayangé du:ryaré.