Gíladpolangku:ka Kouung No

Karsang Takar

o ngok ménama gílad po:langkuka

apéné po:lodok gi:nmur po:lodo

 Ya:lo bo:biné  ésarpé sa:ryidla

 asiném  ansí mo:lígla

lékoném  do:pít mu:tlígla

Édilai síngi ta:lé do du:ngéla

so:yu-pakkompé kabaném  jéligla

ngok asin ru:yídge:la oko:lo

déyok su:kang ku:né.

oko:l déyok su:kan  no:

oko:lo lamtém gíyok su:toné no:

ma:golasin ka:patokumang

ka:ngolasin ka:big to:kumang

líné gé:né ga:pa ga:re gé:né

asi:n si:mad mo:né ésarno.

sékai ri:ksuyémilo lu:bilangku

sé atér   jo:jokbí  nok aya:ngém

ma:la ka:btíla du:ng émna,

lékong ko:pé ayang ka:péi

gi:latokku sé sí:ngi  ísing  so:pé

su:paksin  pu:ntil du:ng

le:kedokké  li:nyumla du:né apunémpé.

No: lu:milo  gi:nmur ajon bímsin

goksu:la mo:maném mo:yéku

le:nbi ku:pé  édé longé do:kké

Érkok tu:Kok su:gela dumdum ma:nkupé

nok oku:m  lo:ttalo nitom jélígla.

gíladpo:langkuka no:

Lígang ésarpé gínmur polodokké

amír saryídné ésarpé

ansíla du:dopé nok ayangé lodíso.

Délad po:langku:ka Ko:ung no

kombong polodo ngo rongamné asinso

Írponkírdopé.