Aropé Ru:néno Du:nei Kama:nei?

 Aropé Ru:néno Du:nei Kama:nei?

Chitrajit Pe:gu

Gali, Jonai

Télé ka:nam geyomné do:mírtém ka:tin-ka:tinsula ngasod abu:ngém banggo:-banggo:la

bottésa:to,

Longékoném do:mírké

Kéra:to:pé gíge:la kíbisuyéku,

Odo longédo ngoluk kéra:pé mé:po bograngé uksíng-go:nying unkampé  unlubyékupé.

Appíng ngasod a:daggom mé:sutungngai longékoném émpéi mé:poko pa:yékupé émna,

Kéra:pé dungge:la:sin

Ngok kinamsokki ba:burangké migmodém lékosin ka:pa:toma,

Ngom léngkansuma:pé, ope: ríngngongém mépagge:la kekonké mo:rumpé gígél gíkangku.

Sokkíddíko mogíd-momadla adi: di:rung ara:lo do:nyi-pédong ka:begmangkolo du:némpé mé:sudag!

Édílai Ru:némé jé:lang jé:la taulí:dag, 

Ru:néno aropé du:nei kama:nei?

Sokkídíko turnyíng tursodopé ru:tailíngém ngom ru:té:manggoméi aidagai.

Okoloi du:síksuka:song mé:podé, oko sí:lu:loi gapsila du:song mé:po bogra:dé, aropé ngok tupsaso jíglíktu:lang mé:po do:jígém?

Ajjoudokkébo sí:sa:to ngasodém jonsu-jonsula, ngok amírso pargablai du:pakkang ngasoddé appírpé.

Longékoném appíngé kayéku, ngasodé yogyéku, ouké amigdo  bidlen-yé mé:po miksipé,

Édé adídém toya:la a:ng pítala su:pakpé turra dung, 

Lékoném mé:sudag sibídnamdéi aiya:dag émna émpige:la....!!

Aropé po:pékémpéyam siyum-sí:rok adí kídí:séi tu:laddungkupé!

Appí:logéi odokké

Ané-abbom urom apin bidí adíso  ané-abudé:dan aíké ao-omma:lok urom apiném bikupénampé idung,

Ayiré kaboma:pé idung,

Aropé adísé okolopéi pí:du:bo:song?

Édémí:pé ngo ajjoudaggom migom agerko gerge:la ouké nappa:dok koyémna yírnamko ka:begdí adíso oubí ngom ajjoudok pinbag apin bilang-,bila usangkamdémí:pé miksém titsu-titsula upa:dungku.

Oubí ludag aropé ru:néno ngolumoi ka:bekpa:don...?

Ngoluk léga:pé ajjoukosinnei mé:po akunko kunté:líktoman 

Éi Ru:na..........???