MISING AGOMSÉ AÍN AGOMÉ

 MISING AGOMSÉ AÍN AGOMÉ 

 Nirmol Perme:

Sanggatolopé gíto

Oangbolopé gíto

Pékingtolopé gíto

Péyangbolopé gíto

Ngoluk Mising agomémpiné agom gompir kisaném okolosin pa:tomang, 

Okolosin popatoma,atpotoma,lupatoma,

Ngoluk agom gomugsé airu:pé lupo-lungaddak,

Airu:pé tatpo-tadandak,

Ngoluk agomsokki mé:po-mé:dír do:yingém Kangkanpé lupo-lungadsupoya:dak,

Amiké abíg agomlok potiném pola, Popímínnamala,

Adla adpímínnamala, Lula lupímínnamala,

Aíké sé aín agomsém lé:pagge:l amiké agomlok,

Pola,adla

siro ngoluk Mising tani:kídísé boje:rungko  lédímokudsula dung,

Ager atí-atí kama:pé ila dung,

Aíké sé aín agomsém lupénamdém mé:nyoksudung,

Bharot mo:rumsok angu-angu tani:lok aín agom lunamdém taddung,

Kangkanpé tatpímínna:toma,

Buluk agom luko-lukolo lumínpé mé:la nappa:sém koka:míndung,

Kangkanpé koka:pímínna:toma,

Buluk abíg jikkolo jigmínto,

Kangkanpé jíkpímínna:toma,

Buluk potin pogo okumlo pomínto,

Kangkanpé popímínna:toma,

Buluk dírbí yélamlo yedmínto,

Kangkanpé yedpímínna:toma,

Buluk aín bíríg bírkolo bírmínto,

Kangkanpé bírpímínna:toma,

Buluk ni:tom tu:li lédído tommínto,

Kangkanpé tompímínna:toma,

Buluk paksong songkolo so:mínto,

Kangkanpé so:pímínna:toma,

Buluk dumdum lu:pi mankolo manmínto,

Kangkanpé manpímínna:toma,

Buluk gélod bomlodém gémínto-bommínto,

Kangkanpé gépí-bompímínna:toma,

Édé appíng ager tarongkídísém germínto -iminto, 

Pa:tomang okolosin , Owé-Ba:buké nappangki: lu:yírnam sé ti:né mullang- alangngémpéyam ti:ya:né Mising agom gomug kisaném,

Pa:tomang édé gíné ngasod ayír -adílo ajonko lusarbosupénamko,

Bharot Mo:rumsok tani: opín takamlokké aín agomé dung,

Dírbí yelamé dung,

Bulu édém sogap-igabbomna dung,

Kajé réngama lentoka,

Aíké a:o -ommanngém lu:yirtoka,

Lédímokudsula du:yobong,

Lédímokudsula du:mílo ammé sa:tídbomyebong,

Agomsé kama:mílo

Dírbísé: yokpakyé,

Dírbísé: kama:mílo

Opínsé: yokpakyé,

Ngolu appíngé a:ng díga:la méngkílai,

Ngolu takamé agomsém lusupolai,

Aíké agomlok métomko atsupolai,

Aíké agomlok gomsarko atsupolai,

Aíké agomlok unna du:né takartolok do:yingko atsupolai,

Aíké agomlok do:déngko atsupolai,

Aíké agomlok do:yarko atsupolai,

Aíké agomlok tani: turgod do:yingko atsupolai,

Aíké agomlok Mo:rumsok Mo:lung do:yingko atsugel,

Anup sí:sané ko: konéng kídísém kinbegné tani:pé imolai,

Potin pogo okumlo gígela Mising potinsém popolai,

Ngoluk aín agomsém 

Lo:dísém unna du:né  takartémpé unna du:molai,

Ngoluk Mising aín agomsém turyarmolai.