APONG

 APONG                                          

                                                          Mg. Ranuj Kumar Payeng

                                                                Ghunasuti, Lakhimpur

    "Nolu yampokolokké apongém tí:ma:bo:pé" -agomdém   yumé pongkogdo yubla dongkodokké durobge:kula Takelebí ané- abudém  jirra luto. Yumédém po:ro-nogin odokké lí:né baranji uskiémsin tí:lutí:yarbosula Takeleké ané abudé ge:mígmínsuge:la dí:mígmínsuto.

    Longédém aipag aimínsula yirsesebosula Makyang né:ng-milbo:dé apong kídídém tí:bosula dungai. Apong tíngursudag Longédém Makyangké Okum íralo:pésin na minom kídídé kondora sigima:pé gíhangka:né. Makyang buluk do:lu:lok Karkong mastordé:sin Makyangmé atay émna Bahadur nepalidok dukandok lí:né baranji uskiémsin botoldém pínyi-píhumpé réla tí:badboge:la yumdéng ayirdo:pag Okumpé yu:ta yu:ma:la Makyangké Okum lokké do:lung lamté arailo odad-oradsula gíkangakui. Yumédém Takele: bí yubpébo émna Buluk angupé monam among okumdo asubdém Pusuge:la gadu gasordém po:lumo:sudungai oddoi Takele:ké ané Rokomibí "Démketobo démketobye sibe:sé , Ngom ímí métungki romketobo romketobo" émna Yumédém yora yora:pé jénggongkugo:la buluk taléng okumdo pamínsula dagnamdém takele:bí tatrasula:ma:la yubkodokké taléng okumpé gísa:langkula ané-abudém aglí:la moríddanna lutumto--"Nolu apongém longé-yumé kinma:pé tíngursupé ido odokké ngolum ao- ommangém mittubém kimopé ido. Su:pak kolokké aso:pé yubamtobolang". émna takele:bí apong tíngursuné ané -abudém lumabge:la ané abudok yubko taléng okumdok ké gi:langkula among okumlo:pé yubkolo kérangkangku. Yumédém makyangbí apong tíngursunam dokki yubala:ma:pé agom ya:ya:pé lusu-lumutíla dungkang. Apong aré namné makyangké nappa:lokké yumédém ambug bugpé buglenna dungkang.

     "Takelekémma:o:pinédé ngok onam ao:a:dé:sin siyum ngom yampokolokké apong tí:moma:nam agom kona lukí lupagkídu:né, Ngo aropagpéi ludu:né buluga:kémpiné abarko pumsuma:né makkunang kídídok lunam agoma:kídídéméi tatyen" émna makyangbí lusula dungge:la akibok tí:lígnam apong ahogko batpagsutoku. Lédupé takirko sukpagsuge:la- "tupi:ka bullaiké ngom yampokolokké apongém tí:yobongka émna lukí lupagkídonéiké, takelebí ministardénéye o:si di:si mai he:mele migomdé:kun. Ngo aropagpéi ludu:né yampokolokké apongém píné sullié assém mungkampé mu:pongo:ye se:kosin se:kosin ngomrung lutuméila:ma:ye; ngolu toku gu:mín-so:yinglok siníying toku gu:mín-soying ta:to-ya:yo buluk lendoa:do lokkéboi apong tí:lai tí:sasunné; ngoluiapongdém makpan sikom taniémpé tí:ma:pé du:la:yen! du:ma du:ma du:danma; Ngo apong tí:ma:pé du:mí:lo aropagpéi ngomakyangéibí:kuma:bo. "émna agomkídídém lusu-lumutíla yumédém yuba:lama:pé makyang bí dungkang. Abudok agom lutíla du:namdém ao takelebí:sin yubala:ma:péyubla dongkodokké tatla dungai. Makyang bí lékoda lusangkangku "Yampokolokké no milbong tíngkotíngkolo né:ng omé ru:pasuma:pé aropé apongsém tí:míndanma:péka. de:ksok né:ngé milbong agom lunamém tatka:ma:pé ima".-- Agomkídídém makyangbí né:ng rokomimé jirdungku. Makyangké né:ng rokomibí:sin milbo:dok oman omanpé kerígsula lumínsunamdém lé:tomang. "No anyima:n karkong mastordok rébinam baranjidém tononosuma:pé toka: toka:la tí:namdém ; Nok bírrangkídídé édémpé édílai ngoluk bírrangém tí:bo rébokítang! anyingé anyingé. Ngoméiké apongsém tí:danyobongké: oy.  Nok begma: tu:ma:né agom kídídém tatmang tatmang" émna rokomisin lubad luyaddanna yumédém lutíla dungkang. Né:dok lubadtíla du:namdokki makyangbí lékoda ímí métungém tígsa:dan-ge:la rokomiké génam ege gasordo unjer unyerla dagdopé démpaglígtoku. "siyebo siyebo ngom siyumké yuméso Makyangbí mokedantobo mokedantobo" émna rokomibí jénggong kugomínsula okumdo urradla dungkang. Yubla dongko dokké takelebí ané-abudok démmínsunamdém tarrasulangkuma:la ané abudok dungko taléng okumpé dugsa:langkula aglísa:la démpé papé émna asudko alagém lé:mélé:ma:la morídtoku. Yuméyumbu:dém jé:lad kuladla Rokomibí kabyubsukang. Yumédém Makyang bí lutíla dungkang-- "Ngo apongém tí:ye; apongém tí:tíye.Ngo ramné kiné taniéi lendo:n apongdém tí:ma:pé yoddano:la du:yen. Ngo kristanéi; Ngo joyguruéi mai ngo ongkori onggo dormo jajogéi lendon apongém tí:ma:yen. Ngok tí:namém ka:la se:kai tí:mínpé lagima:da. ngo abbomíng kolímílo okum amongém, so:bo-menjegém kopagamdan-ge:la:míng tí:ye, se:ko okko émna lula:yené:. Silo silo yampo yampo ngok onam aodé:sin ngom morídkangkubo. Bulu aidagnémpé mé:sudu:pe:m aidag  bulusin ngolum yamporo: déryango:yepé ngo pelígmang déi, bulupak pekosudung. Ngo ngo aidag aimang takelemé lang bu:dormé poraila metikkoi pa:s motagmín. Ngo poraila:tagmín. ngo aro milbong aomíng. Bélé Bélé Moidesor mastorbí migomlok murkong aba:ko pangge:lasinyem bík o:yong ao nilokanto:mé monbangé bagdopé moton.  Bí ngokkémpé poraila:tonéi. Ngomké so do:lu:so aimang émna se:kai lula:yené! Lupénédé se:kon takelebíye mai rokomibí:n? Ako ako okumsokké ménpagamdanye, aima:mílo Bornoi a:né-abungolo tégyudamlígye Ngom se:kosin aglíng sa:moma:pélangka! "émna yumédém makyangbí yumédok píhang kikirik kokdaglo:pé lusulumula lula dungge:la yubngagsukangku.