Nébíngké Lupénam (সম্পাদকীয়).....

 Nébíngké Lupénam (সম্পাদকীয়).....

  Lo:bagné Asindém Supagar Yoppaktok

     Ngolu appíngéi turra du:nam léga:pé agerém gerdo. Agerdéi tani:lok turgodé. Ager atung germa:pé tolo bolo:pé gígola du:né taniyém ngolu lo:si lo:bagné émna ludo. Édé tani:kídídé réngamlok yogmo:é. Bulu aíké turyi:dok léga:pésin yogmo:é. Donam tí:namko, ainé ainé galuk gasorko gépa: bompa:mílo angupé okkomsin bulum lagimang. Édémpin tani:kídídokké aíké émpé okkosin kamang. Bulum murko:lok répé: répagladag. Murko:lok réla pa:nam tani:kídídé ainé tanimang, bulum ajonpésin jonpénammang. Murko: léga:ngé nom kapéi iyesong édém ma:nyi:bosin ma:bekpémang, édémpin tani:kídídokké ansu: ka:sula du:namdé ainé ageré. 

        Angkir biddopé sikí-silí:la sé:ko agerém germa:ji bí édílosin ainé tani:pé badlamang. Ainé tani:pé ipé mé:domílo a:ng dígdanna gernam agerém ménggabla gerpa:ye. Gerjer-geryerla, to:lém-to:sémla a:ng dígama:pé ager germílo ainé yi:mangko pa:lamang. Ainé yi:mangko pa:pé mé:mílo mémang ke:ke:pé agerém gerpa:yé odopak ainé yi:mangko pa:ye.

     Silok agerdém sillouíng gerbítto. Yampo kapiné ngasotko a:yesong édém ngolu kinmang. Ajjouk lédu:pé émnamdémtu supaggíng mépaktok ékémam ajjou:dokké yampo:pé gíyé, yampo:dokké ro:pé gíye. Agerdém yampo yampo émna tokumsudagdo bojeru:né jo:jemko ipagye. Ngolu édílosin agerém gerpísulangkuma:ye. Ager gerpísulamanamki asinésin mé:po sakpo:maye. Émpila ngolu édílosin gerpénam agerém toyon tosonsuma:pé adí:ém ka:la agerém gerpítpénamé. Turnamsé angupé okkosin kamang. Agerdéi tani:lok turyingé. Émpila ngoluk a:ng ara:sokké lo:bagé émnamdém yoppaggela gerríngé émnam a:ngko sillarkíddí mé:paye dokké mé:la du:nam ainé agerkídídém gerbomna gípaye.

  

Tapan Lal

Nébíng (সম্পাদক)

Doksiri দকচিৰি