SO:LAKKÉ SAGÍ !

Sumidhar Padi

Gogamukh

So:lagbí sagí gíla kabdung,

So:lagbí jé:la: jé:lá kugo:dung!

Bí: ngom kabla: kabla: lubisudung!!

Bíkké ngasod do:yingém.

Bí: kindungai O:ké sinam turnam rísoném,

Bí: pa:mo:dungai O:mé obo po:lum omé ao:kosin.

So:lagbí taddung bík imurdé okkan,

Bí: mé:pa:du:ngku O:ké angkir bidla kabla: jé:na:mko,

Bí: tadbegdungku O:ké bimmo:ng ka:sa:la ru:ném kumnamko.

Bí: yokpagdungku aso: aso:pé réngam ara:sokké!

Édépag bíkké asin ara:bok lusarsula:manam  mé:dír agomdé!!

So:lagbi lékoda "okum koktogdo" O:mé obo ka:lí:dungku!

Bí: lékoda O:ké obo yollenko yonmínní:du:ngku!!

Bí: anní:dungku O:ké alag so:nyi:ki "turríng" mimag monamko,

Bí: kinní:dungku O:ké bím orrsunam "turnané mimagdok" migang ga:na:mko.

So:lagbí O:mé asinang odungku,

So:lagbí O:mé tallídungku,

"No: aila du:n, nokké pésokokki: jé:namdém mé:pa:dungkun?"

"Nokké sinam pésola ta:to ya:yo:mé gognamdém mé:begdungkun?"

"Nokké obo po:lumbí sipakpéké émna asin siya:la: kabnamdém

mé:begdungkun?"

Ngo: no:k aya:nam so:lagbí taddung,

Ngo: no:k mitpannam So:lagbí ludung.

No: ngom aroru:pé mitpan ma:péka.

Doksiri দকচিৰি, আগষ্ট, ২০২৩