সম্পাদকীয়

 সম্পাদকীয় Nébíngké Lupénam

                                                            Tapan Lal

Méngku:b–mé:labla du:dodo Agomé yokpagyé

         Su:k anu adíso appíng mising sí:sa: ya:me: mímbír ké nappalo tadbegdag – Ngolu misingé, agom mirémé. Ngolu misingé dírbí mirémé. Agomdém ma: émnasin tolíggumang. Ohom mimo:so aropé lukapé gímílo ngolu:k Mising opínké dírbí-dírlabé anguru:pé ka:yumdag. Émpigela “Agom” agomdém agom do:pín ara:pé ngengala ka:yémílo okolai okolai kéíkpé ajengko su:pakpé du:némpé idag. Luka:pé gímílo su:paksin akke mising Gombíg, Bana dok légangé lujekka: mínsunamém tadbegdag/ka:begdag. Édé lujek kané agom kídídém social media lukanpé – Facebook, Tweeter, WhatsApp atí atí lo adnamém ka:begdag. Édé mising agomsokképé airupé aimané ngasotko. Mising Gombíg, banan légangé lujekka mínsu:l du:né sí:sa:lok kinné pa:né ope: kídídém lékkongkodaggom Mising Agom Do:pín potin kídídém polangka émna ngo atékpé kumpadung. Odo mising Gombíg, banan mé:mo appídé yokpakyé. Odokké social media lo ajengkané agom kídídém adma:pé mising agomsém pu:po jarpo:la unjerra du:monam légangé agom gomlab, dírbí – dírlab do:yingém adjarbompa:ye, lujarbompa:yé.

      Aíké arangíso mé:dírpénamko. 1972 dítag do Mising Agom Kébangém ba:len dokkébo silopé bojérungko adí:é ikabong. Émpigelasin su:pakpé mising agomsém asin méngkampé pu:po jarpo:molamada. Mising agomlok appíngké tolígnam gompag (standard language) ko su:pakpésin lenmolamada. Kapila émyemilo sí:sang ope:sé agomsém pu:po jarpo:monam légapé agerém germa:pé idung. Agom gomlab agerdém toyon – tosonsula, méngku:b mé:labla du:motsudung. Édégom do:yingko. (Leke: do:yingé. Su:paksin akke mé:modag.)

      Lékomílo léko lenyerung. Ngolu su:pak L³ (Lékomílo Léko Lenyerung) ilamkokki agerko Agom légapé gerpaye. Tolígnam Gompagé (standard language) kapé lendon – Aso asopé lutí lutíla, potinno, lusarlo adjarla, lujarla du:mílo aí aíéi édémpiné tolígnam gompagé lensudag. Émpila Ngolu su:pakké anu: Digital adí:so anu mé:lotki, anu angki asin dígla agom agerém gerpa:yé. Odo ara:do atékpé gerpénam ager ako (E Magazine) I lusar.

      Ngolu appíngéi kindag, su: leke:kémpé potiném, lusarém réla poritokumabong. Migyaboulo kapé mo:písok lutadém pa:la:yén ?! édémpiné anu mé:lodém silo mélo:k tani:é méngkangkubo émpila ngolusin (agom ager gerné ope migyaboulo kapé réngam asin ara:lo, tani: ang ara:lo Agom goblab, dírbí – dírlab do:yingém níngalíglayén,kinmola:yén édém mé:pé idung. Odok légang gerpéru:nam agerko (ই মেগাজিন) I lusar ager taru:sé. Dépila ngolu ang dígdanla sé I lusar ager taru:sém gerbomyé émna ru:sekto. Odok légangé appíngé lékopé agerém gerbompayé.

       Mising agom gomlab mé:boné kídíngé aíké mising agomsém mo:píso turyarra du:monam légangé tedrasu:mapé, du:rasu:mapé agerém gerpa:ruyé. Odopak nglou misingé agom mirémé émsulayé.

     Lo:bagné tani:émpé ngo manggo bí geryepiyam émna toyon – tosonsula, méngku:b mé:labla du:dodo aí:ésin gomlab mo:pídokké yokké dokké mising agomsé:sin yokpakyé. Émpila ngolu nékamínsu:nam agerkídídém mépakru:payé.

      Lusetlíkla agom apirko lulenmanggom asinso takotko du:pagyé. Ngolukké aíké opín arangíso ajjouné – bottané, abíné – ame:né émna lukamínsu:namko ka:begdung. Agom légapé, opínsém lékola du:monam légapé édé aiman agomé. Kai nglou appíngé lékolai agom légangé, opín légangé. Aíké turyingoudok légangé agerém germa:pé, aíké turyingoudok potiném adma:pé, réngam légangé, opín légangé, agom goblamsém turyarra du:monam légangé rélékpé agom gomlab, dírbí-dírlab agerko gerkílai.

      No la: ngo lékomílo akoné yogdaggom akoné du:yé, do:yingém kíbiyé. Agomésin édémípé du:yarra du:yé. Odo sékkésin mé:mo kamayé agomé yogyé émnamko. Sa: édobo.

                     Mising Agom Írroi

                      Mising Réngam Írroi.

                                                       Tapan Lal

                                                         Nébíng সম্পাদক

                                                DOKSIRI:দকচিৰি: