Poyirnéké Longé (Teachers' Day) éla: Dr. Sorbopolli Radhakrishnon

 Poyirnéké Longé (Teachers' Day) éla: Dr. Sorbopolli Radhakrishnon

      Kalinath Panggíng

   Ngolu appíngéi kindag -- takkílok 5 Septembor longkídém "Poyirnéké Longé"(Teachers' Day) émna moí:rdo. Sé Poyirnéké Longé moí:rnamsok arang agomko kadung. Édé arang agomdé sémpé --1962 so:ndo Dr. Sorbopolli Radhakrishnon-bí Bharot mo:rumsok Mo:rum Abu (President of India)pé idodo bím aipé mé:né mipo-midumékké Radhakrishnon-mé ka:ríksula bím onané longédém "Onané Longé" émna moí:rpé émna tausuka. Odo Radhakrishnon-bí lukang--"ngok onané longédém (ngom) "Onané Longé" émna moí:rma:pé "Poyirnéké Longé" émna moí:rmílo ngo aipé mé:yumsupé". Radhakrishnon-ké lukampé mipo kídíngé bík onané longé 5 Septembor-dém 1962 dítagdokké Radhakrishnon-ké Onané Longé émma:pé "Poyirnéké Longé"(Teachers' Day) émna moí:rropto.Odokké odo dítagardokké silopé Dr Sorbopolli Radhakrishnon-ké onané longédém "Poyirnéké Longé" émna Bharot mo:rumso moí:rbomna gídung.

            Radhakrishnon-ké turying turgolok dítag yi:pi: kopé poyirnépé ila bí aroru:né poyirnékai.Édémí:píla Radhakrishnon-bí Mo:rum Abu oi, Mo:rum Abu,Rastrodut,Tadgénam philosopar-pé ige:la:sin aídém Poyiné émnapag kangkinsudungai.

    Dr.Sorbopolli Radhakrishnon-mé Sennai mimo:lok Tirutani émnam do:lu:do 1888 so:ndok 5 Septembor longkído otagai. Bík abudok aminé Sorbopolli Biroswami odokké anédok aminé Sitamma. Radhakrishnon-ké amindok po:pé Sorbopolli émna adnamdok agomko kadung. Édé sémpé--Radhakrishnon-ké toku-toyu kídí:dé Sorbopolli émnam do:lu:dok tani:ai.Bulu Sorbopolli:dokké Tirutani do:lu:do:pé gi:la oddung aginpé du:yarkang.Odo do:lu:dok gi:pagné appíng tanié okoloi du:daggom aro do:lu:dok aminém min-gapsula amin kídí:do adlíksunam adlotko dungkang. Édémí:pé Radhakrishnon-bí:sin leke do:lung amin Sorbopolli-dém atté:la Sorbopolli Radhakrishnon émna atsuto odokké édémí:pé bík amindé:sin "Sorbopolli Radhakrishnon" pé ikang.

      Tirutani pogolo porisa:né Radhakrishnon-bí me:lampé Burhej Kolej, Madras Krishtan Kolej,Madras Iunibharsiti atí Kolej kídí:lo porila amin gídopé anka:lo pa:ska. Iunibhersiti-lo porila du:dolo:boi bí "The Ethics of Vedanta"émnam aipé o:rí:né potindém adla kinné ope:ém méngka:la ka:moto.Édé potindém tígé:la adnam "The Ethics of the Vedanta and its Metaphysical Presuppositions" émnam potiní:dokki bím Doktoret digriém (Doctorate Degree) toyumka.

Radhakrishnon-bí de:kko potiném adlen-ge:la réngamém bige:la gíkang.

Bík adnam potinékké--

1.The philosophy of Rabindranath Tagore (1918)

2.The reign of Religion in contemporary philosophy(1920)

3. Indian Philosophy (1923)

4.The Hindu view of life (1926)

5.An idealist view of life (1929)

6.East and West in religion

7.Kalki or the future of civilization (1929)

8.The religion we need(1928)

9.Gautam the Buddha

10. Eastern religion and Western thought

11.India and China(1944)

12.Religion and society

13.Education,Politics and War

14 Bhagavadgita

15.Dhammapada

16.The Principal upanishad

17.Recovery of faith

18.The Brahma Sutra

19.A source Book of Indian Philosophy

20.Occasional speech and writing....atí atí.

  Radhakrishnon -mé bangkí bangkí kéba:-miba:lokké bangkí bangkí amanémsin toyumka.

   Dr.Sorbopolli Radhakrishnon-bí ngolu appíngém mépagge:la 1975 so: ndok 17 Epril longkído uyu amo:pé gíkangku.

 Bí kamanggom bíkké gerla gínam ager kídí:dé a:péné adí kídí:do takam réngamképé mima:pé aginpé du:yarye.