Rísu

 RÍSU

                                               Horish Dole: 

     Rísu émyémílo aromanggom mé:lígnam atí akolok du:térko odokké angu atílokké angumunsumonéko. Appíng atílokkéi aíké rísuko kado. Tani:lok aímunsunamlokkésin rísuko kadung. Rísué ainé agomlo airu:pé aidag odokké aima:yémílo airu:pé aima. Siné atílokké angupé turné takamé aíké rísué éddíko béjéyéji odogíngkíddíko mé:podag. Édémpilai mo:rum akoné akon mo:rumkoném mimag mopé émna itíla du:dag. 

     Opín akolokkégom aíké rísué kasudung. So mo:píso oko opíndé édé aíké rísudém mosí:sula du:la:ma:yéji édé opíndé turredla:ma émnamdém do:píné lubitíla dung. Opíndé turnapé édé rísudém mosí:supa:ru:yé. Édé rísudé amo: rísso:ma. Opín akolok rísukídí:dé among, agom, dírbí, yélam, dolod-tí:lod, ager ilod, du:lod-daglod édébulu. 

     Mo:písok ajjou ajjouné opínkídíngé aíké kangkin turmonam légangé rísu kané amongko bipa:yé émna aíké aíké migomém do:ri monamém ka:pa:dag. Édém bulu aíké kangkin turmonam légangé madag. Émpige:la édé opínkídí:dém tani: pí:ramdag émna buluk édé do:ri:dém migomé ménga:la aré bima:nammém ka:pa:dag. Mo:rumké édémpé aré bima:nam opínkídí:dé aíké rísu kané amongém pa:la:ru:ma:bonna bulu angu rísukídí:démsin aipé mosí:sula:ma. Édémpikolo édé opínkídí:dé longékoné aso:pé sipagdag.  

     Pu:mi assé punga:yém édém takamé ka:pa:dag émpige:la opín akoné opín akoném néra:yém édém silo-méloké adíso appíngé ka:pa:ma. Bétténé opínkoné ame:né opínkoném rísu takamlokké néra:bomla longékoné édé ajjouné opíndém sipagmodag. 

     Tapumé simangkoném kapé pangkodokkéi pénga:bomdagji édémí:pé ame:né opíndém bétténé opíndé néra:bomdag. Angupé atékpé du:né opín akoné aíké agomki luposudung émna mé:dogom buluk édé agom ara:do kéra:pakké du:né béttéya:né agomdok gompiré aso aso:pé pínga:la ajjouné opíndok agom gompiré aso aso:pé yoga:la gípagdag. Édémpéi longngém longépé agom rísudé néra:dag. Ame:né opíndém agom rísudokké ila angu rísuésin édémí:pé néra:la du:tídag. Tani: pí:ramné opíndok du:téngkídí:do bétténé ope:dok tani:kídí:dé aso aso:pé ginga:la buluk du:téng rísudoksin néra:la gínamém idag. Édémpé ginga:míloi dírbí, yelam, dolod-tí:lod, gélod-bomlod, agom lulod, du:lod-daglod édébulusin pínga:míndag. Odokké édé appí:dé édémpé ame:né opín kéra:do:pé pínga:míloi édé opíndé aíké takam rísuém yogmodag odokké longékoné aso:pé siya:la gípagdag. Édémpé itíla du:dodo ame:né opíndok rénam-konamdokké ila pagbo gínamlo:pé bétténé opíndok tani:kídí:dé irotpagdag. Odo ame:né opínkídí:dok tani:kídí:dé aso: aso:pé murkong ngasoddé a:dag. Édé ngasoddé a:míloi ngasod béjéla tani:kídí:dé bétténé tani:kídí:dok lédulo lékola ilen-siyang agerko gerpé idag odokké édémpéi yedlusula du:dodo béttéya:né opíndé ame:né opíndém mednané agerdém éssango:pé ila:dag. 

     Mo:písok opín kídí:dok abung ru:yi mé:boné opín ako Mising opínsé. Leke addém abu: ru:yi:lo du:né tanié airu:pé okodoksin pí:ramma:pé pa:pénam takamém pa:dungai. Asidokké ila ongo-opum, oying-oge:, ísíng édé takamdém pa:la oko ngasodésin kamangai. Émpige:la silo-mélo édé do:yi:dé angukangku. Siloké adíso asiédan ménna dungko dakko kama:la olomang-tolomang ipagdung. Mising du:téng rísuém édémpéi assé dítagém nértíla gítídung. Dungko-dakko kama:la silo gi:pid-gi:yitsula opín akoné ipid-siyitsudung. Édémpé ipitsunam opíndém angu opínlok yelam, dírbí, agom édé takam rísudémsin mé:mango:pé néra:nané lambédém pa:dung. Édémpilai méngkandag, silo Mising opínsé siyébo:pé émna. Siloké Mising tanié anu dítag moírnamdokké ila kati bihu, lokkhi puja, diwali, bohag bihu, magh bihu, durga puja, shibo puja, holi, kristmas, monosa puja, kali puja édémpiné sable sabamla:ma:nam amiké ilotkídí:dém imínla gídung. Édémpiné rísukídí:dém Mising tanié édílaibo ke:badla gítagbo. Édémpé gíkolo Mising tani:ké aí kangkin yognamdokké ila murkong ngasodésin béjéla gítídung. Asi bidyudnam Mising tanié ami ilod ikolo gí:rob-badrobla:ma:pé inamdém ka:nésin ka:tíla dung. Édémpila édé rísudém kínggí:monam agerém ipa:yé. Odokké édém kíngí:mopé opíndok kinné-pa:né tani:kídí:dé daglenpo:pa:yé. Opíndok kinsuma:né tani:kídí:dém amig darsunam agerém gerpo:pa:yé. Édém ila:ma:mílo opíndok sinamdé bérogébo.

     Kinné émsuge:la ka:lígla du:yoka

     Simílo opíné nok kinnamdé aré kama:yé

     Rémdag émna mé:lola du:mílo 

     Yírné-yírmang yírka:yé

     Siro:do opíndé angkéng beddogom

     Turnamdéi turpo poma:yé.

     Daglentok silo no aí kangkin légangé

     Aíké rísuém du:yarmolai

     Kinsuma:né angé-bírrangém kinsumoge:la

     Kajé ngolu aro tani:pé turra:jé.