Agom  Anénom  Kapé  Yumoyen ?

Harinarayan Pe:gu

Agom  Anénom  kapé  yumoyan

Ngo  ka:ríksula:mang.  

Nokki  ta:to  ya:yo

Émsa:né  omma:ngé

Ayyo  ponapkang.

 No  kama:mílo

Urom  kosag  

Pukko  kamang

Aíém  kangkinsunané

Dumsíg  lenmang.

Nok  so:laglo

Bítinsula

Ngutkídírné  opeyé

Amikolo  pagbo  gíngapkang

Bérkutsukunané  amigé  miglamkang.

Nok  ago  ka:líné

Simatpé  madamdung

Yuma:dapéi  dodgang  dodung.

Mé:tabla:ma:n  akke

Angkéng  beddung

Ngatur  sula:mal

Lésu:  lébe:  gédung.

Aték  kungke:  méngkolo

Nom  pagnépé  méto

Ngasar  sula:ma:la

No  ngatumsuto.

No:ma:m  yorangé

Kémmo  jí:jíngé

Tumbo  bélamlok

Do:pín  taglíngé.

Mé:tér sunané

Angkéng  ru:bongkang

Kaptèr  sunané

Miksé  pínkang

Agom  Anénom  ka:yudlígnané

Ngokké  a:pí  kamang

Nom  turmokunané

Kusere:  pa:mang.

Nok  agodok

Kampu:n gasordé

Ngom   simadmoyé

Lo:yid  mo:bolo

Ngom  atér    térmoyé

Agom  Anénom

Kapé  yumoya:n

Ngo  ka:ríksula:mang.