পুৰণি

                    হিতেশ মেধি

                             ছিপাঝাৰ

কদম তলৰ ৰাতিবোৰ পুৰণি

কানাইৰ বাঁহীৰ মাতত ডুবে

উশাহ সলাই পাহৰিব নোৱাৰি নিশাহক

এন্ধাৰ কাটি মূৰ তুলি চোৱা পোহৰত দেখোঁ

কোনোবা হাতৰ সুগঢ়ি মায়া

মায়া মায়াময়

দুকুল উপচা

মায়া পিতাইৰ বুকুৰ ববচা বন

আইৰ মাতৰ নিগৰি পৰা নিজান

বুকুৰ লোঙাত ডিঙা মেলা ছাঁ

হেৰাই যোৱাবোৰ বুটলিবলৈ হ'লে

পোহৰৰ ছাঁৰ প্ৰয়োজন

ঠিক বেলি উঠাৰ আগৰ খিনি!

বেলিৰ বেলিকা ঠিকনা বিচাৰি

মই পুৰণিতে হাত থলোঁ

সাগৰ নচুৱা ঢৌত উটি

বুৰুলিত পুঙা কাটিলো

গান এটা সুৰ তুলি

মই বুকু খন বিচাৰি চালোঁ

কিনো এনে বতৰা

মোক হেৰুৱা বুকুখনে পুৰণিত পঢ়ি আছে

পাহাৰ গজা এটা ৰাতিৰ কথা

এনেকৈয়ে ঢলফাটত দেখো বেলি পুৰণি ৰ'দ

বৈ থকা নৈ পুৰণি কথা

আকাশ ফুটুকীয়া হোৱা অলেখ আখৰা

পুৰণি- খোপনি পোতা

পুৰণি- সময় গৰকা

পুৰণিবোৰ বসন্ত নচুৱাই সামৰা পৰ

পুৰণিতে মই পাওঁ পুৰঠ মেঘৰ ছাঁ

পুৰণিতে মই পাওঁ নিলগৰ নৈৰ সাঁচতীয়া কথা

পুৰণিতে মই পাওঁ মোক বুৰাই পেলোৱা জিকাফুলীয়া জীৱন

এদিন তেওঁ কলে নতুনকৈ লোৱাটো নিয়ম

মই কলোঁ গাৰ ছাঁটো সুলকি নপৰক

য'ত মই পুৰণিতে বিচাৰি পাওঁ নতুনক