MISING GOMLABLO ATSON GOMLAB

 

                                                                                        Horish Dole:

     Agom akolokki adnam potinkoném angu agomlo:pé atsonsunamdém atson gomlab émla:dag. Rémné agom akoném aíké agomki atsonsumílo odok du:né angu angu mé:yi-mé:sang manggom anuné ainé mé:lod kídí:dém kinmínla:dag. Atsondok luké:dé tamténg ako lénggusuge:la édémarpé angu agomlo:pé adnam.

     Atson gomlapsém angu angu mé:jubné angu angupé topansunamém ka:pa:dag. Odok akon asagé kéíkké topansukampé atson gomlabém topansudag ....

1.Atsonnok arang agom topan: So atsonnok lukéngdokké ila gompir kin-golo:pé la:té:tag.

2. Tani: topan: So atsonsunédok pagnam pagmang, atsonsunékídí:dé gomlab labnéi labmanéi, bulu odok légangé aipé poyirsutang poyirsuma:n édémbulum la:té:tag.

3. Do:pín, agom, dírbí topan: So angu angu mo:rumlok atsonlokké ila aíké gompir, agom, gomlam odokké kedné agom édémbulum la:té:tag odokké –

4. Inam topan: Gomlablok atson Bharodlok gomlab labné lokké ila lutad adné, runggo, kompiutarlo atson ngasod édé appí:dém la:té:tag.

     Atsonsunamém kapépak atsonsupénamméji édém mé:jubné ope:kídí:dé aíké aíké mé:namém lukantung. 

     ‘E. A. Nida’ émnam mé:jubnébí:sin atson gomlab do:yingém ai-kangkanpé atsartung. Bík “Toward a science of Translating” émnam potindo atsonsupédodo ménggappénam appi:ko légangém bitag. Édébulu sémpé –

1. Atsondé aré kapa:yé.

2. Atsonsupénamdok adnam o:rí:dé atsonsukodo:sin du:pa:yé.

3. Atsonsunamdok agomdé rémagla odokké appíngé kinna:dopé ipénammé.

4. Atsonsunamdé atsonsukodok dungkamí:pé poné ope:dém mé:líksumonané kanamkídí:dé kapa:yé. 

Atsonsunamdém kapépag atsonsumílo aiyéji édém Lefevere émnam mé:jubnébí:sin kínítkopé adla léngkantag. Édébulu sémpé  -

1. Phonemic translation

2. Literal translation

3. Metrical translation

4. Porse translation

5. Rhymed translation

6. Blank verse translation

7. Interpretation      

     Atsonsudodo ménggappénam do:ying ékké kéígbé atsedla atkantung  -

1.Appíng agomlokkéi aíké aíké kapénam kalod-du:lodé kasudung. Édé ka:lod du:loddém aiyo:pé kinpa:yé.

2. Atsonsunédé atsonsupénam potindok arang luké:dém aiyo:pé kinpa:yé.

3. Atsonsunamdok mé:tégla adnamdok anguma:dopé atpa:yé. 

4. Atsonsunédé atsonsupénam odokké atsonsupéko agom annyidéméi aipakpé kinpa:yé. 

5. Aíém angupé ménggo:ma:pé ila:do:pé asin kínggí:pa:yé.

6. Atsonsudodo atsonsunédé aíké mé:namém líkté:daggom atsonsunamdok agom, mé:lod appí:dém kétinsugela:pag atpa:yé. 

7. Atsonsunédokké mé:lensunané kin-goésin kapa:yé.

     Atson gomlapsém kapila ipénammén?

     Atson gomlapsém kapila ipénammén odok légangé béjéko kadung. Édé légang kídí:dém kéígbé atkantung –

1.Siyum-sí:rok tanié angu angu opínnok gomlabém kinní:dag odokké édé kinpénammé. Angu agomdém kinma:nésin aíké agomlo:pé atsonsuyém kinna:dakku. 

2. Atsonsunamdé angu angu gomlablok odokké asinlok ara:lo kinbosumonam bélamko la:lendag.

3. Atsonsuyém dírbí akolokké dírbí akoném kinmínsunané  bédangé lendag.

4. Rémné gomlablok adlotkídí:dém rémma:nékídí:ngésin ka:yi:sula:dag. Lukanmílo Inglish gomlabém ka:yi:sulai Ohomiya gomlabé anu adílok bélamé lamlenkang.

5. 1888 dítagdo Sekspiyerké ‘Komedi op Eroroj’ dém Ohomiya agomlo:pé ‘Bromoronggo’ émna amin bige:la atsonsutagai. Édém do:sokpé ila mo:lég mo:léglo léngkangongka odokké ka:né aipé ka:líksukang. Édémpéi bulu anu do:soglok anu bédangém la:lenka.

6. Mo:písok angu angu agomki adnam gomlapkídí:dé agom akolok gomlabdém rémmola:do. Kapila émyémílo édémpiné gomlabdém atsonsukapé gídagdo aíké aíké agomlok du:né kapénam odokké édém lulennané gompirkídí:dém anpa:sudag. 

7. Rémné agom akolok gomlab ako aipé o:rí:pé lukéng kadopé addodo béjéko ainé ainé gompirém líkpa:dag odokké líkté:dag. Édémpiné aré kané gompirkídí:dém atsonsukapé gídagdo:pag aíké agomdok  manggom atsonsupéko agomdok gompir pí:ramdém anpa:dag. Édé pí:ramdém pí:mopé émna idodo opanné agomdokkésin aso: aso:pé anu gompiré lenna longéko rémnané bédangé lendag. 

     Atson gomlapké béjéko ainamé kadaggom aimangésin kadung.Édé aimangkídí:dém kéígbé atkantung –

1.Atson gomlapki atsonsupénamdok mé:tomla adnam, arang lukéng, édé appí:dém méngkampé atsonsula:ma. Lukanmílo Rubayotké Umor Tirtodém béjéko agomlo:pé atsonsutag. Émpige:la bík atkamdémpé okodé:sin nérkígma.

2. Ispeinlok mé:jubné Khuse Ortega Gesetké lukampé Atsonsunamém ila:ma. Adnédok aíké adloddé atsonsudodo ngasodém a:modag. Bík agomdé:sin angu agomki angumunsudag.

     Atson gomlablo ako annyiko ngasodé kadaggom atson gomlabddém ipénam légangé béjéko kadung émna taléngké atkannam kídí:togéi kinna:dag. 

     Mising Agomlo Atson Gomlab:

     Angu opíní:ngémpé Mising agomkisin atson gomlabém ila dung. Émpidaggom Mising gomlablo atson gomlabé béjéko kama:da. Silopé aipé pí:rampépag atsonsunam agerém ila dung. Édé arangí:dok ako annyiko atsonsunam ékké kéígbé atkantung -  Taburam Taítkéla Onil Pe:guké Ya:yoké Do:ying, Birgumuni Kagyungkéla Joyonto Kamanké Ko:kang Pomannam Mé:tom,  Gubindo Taítké Bharotsok RunggoPotin, Tatponé Do:ying, Kalinath Panggíngké Mising Miyum, Tulesor Pe:guké Isopké Do:ying, Dipok Dole:ké Jibonor Batot émnam Ohomiya do:yardém Mising atson, Umorké Mé:tom,  Indesor Peguké Gitanjoli, Deben Pe:guké Bhagobot Puran, Ghono Kt. Dole:ké Akon Akon Mo:rumlok Do:déng, Isopké Do:ying, Bayugla Atsonsunam Do:ying, Jatoglok Do:ying, Torulota Dole: Pe:guké Muglíng Ésar, Horish Dole:ké Ayang Abung édébulu. Émdaggom sémpé ako-annyiko atsonsunamsé Mising agom rémbodopé píra:mdu:da. Adnékídí:ngé atson agerém béjéko atpa:yé. Odopag agom rémmoné gomlab-gompiré len-yé.

     Atson gomlapsém akon-asagé kapéi ludaggom opanné agom akoné mirémné agomlok gomlabém atsonsumílo rémnané bélamé lamnen-yé. Édémpé ila aí agom pu:po-jarpomonam légangé siloké adíso atson gomlapsém ipéru:nammé. Mo:písok amin gíné potinkoném aí agomlo:pé atsonsuge:la aí agomlokkisin ainé amin gíné potinko len-yé odokké édé amin gíné potindéi aí agomém pu:po-jarpomyé.