ব'হাগ মাথোঁ এটি ঋতু নহয়

 

কথা কবিতা

 ব'হাগ মাথোঁ এটি ঋতু নহয়         

 ৰিণ্টু টায়ে

ড° ভূপেন হাজৰিকাতকৈ বেছি ভালকৈ ব'হাগ মাহটোক উপলব্ধি কৰিব পৰা কোনোবা দ্বিতীয় এগৰাকী ব্যক্তি ওলাব বুলি মোৰ মনে নধৰে। এই বাবে মোৰ লেখনিৰ শিৰোনামটো তেখতৰ বিখ্যাত এটি গীতৰ শিৰোনামকে ধাৰ কৰিলো।

ফাগুনৰ মতলীয়া বা লাগি তল সৰে গছৰ হালধীয়া পাত। 

পলাশ ,শিমলু,মদাৰে ৰঙীণ দলিচা ল'লে লঠঙা দেহাত ।

চাওঁতে চাওঁতে ফাগুনে বিদায় মাগিলে হঠাৎ

 শুনিলো কুলিৰ মাত 

চ'তৰ এই  প্ৰথম পুৱাত ।

ঢোলৰ গুম গুমনি মনৰে আমনি

বিহুৰে আখৰা চলে ,

মেট্ৰিকৰ দেওনা আৰু নাথাকিব 

এন. ই .পি. বলবৎ হ'লে

শেষবাৰ পৰীক্ষাৰ্থী (তুমি) ভাবিলে -গুণিলে

 ভুলতো নোৱাৰা যাব এইবাৰ

বিহুৰে আখৰা তলীলে,

 দেউতাৰ কাঢ়া শাসন চলে!

ব'হাগ আহি পালেহি বেছি দিন নাই,

কুলিৰ মাতে সোঁৱৰালে ইনাই বিনাই!

ব'হাগ মানে কি? এটি মিঠা অনুভৱ!

ডেকা গাভৰুৰ প্ৰেম প্ৰণয়ৰ ভেটা ভঙা বান

নে 

কপৌফুলৰ নিচান , 

প্ৰকৃতিৰ শোভা যৌৱনা গাভৰুৰ গান ?

সেইবাবেই  হয়তোবা এদিন

সুধাকণ্ঠই  নিগৰালে

" ব'হাগৰ প্ৰথম পুৱা

নকৈ গাভৰু হোৱা

এপাহি কপৌফুলে 

কাণে কাণে ভোমোৰাক ক'লে,

ক'লেঃ এ' মই ফুলিলোঁ হে '

(মোৰ) পাটগাভৰুৰ মন

কুমলীয়া মই একোকে নাজানো

নুশুহিবা মধুকণ ।"

ব'হাগ মানে ডেকা গাভৰুৰ

ইচাৎ বিচাৎ মন !

প্ৰকৃতি নৱ ৰূপ 

কুঁহিপাতৰ কোমল স্বৰূপ

মৃদু বতাহত বেলিৰ হাঁহি 

জীৱনৰ সোণালী কিৰণ ।।

ব'হাগতে পাওঁ সম্প্ৰীতিৰ ৰূপ ৰেখা,

আনকালে কোনদিনে নেদেখা ;

গৰু, গুৰু উভয়কে ভক্তিৰ এনাজৰীৰে

বান্ধিব খোজা ই যে  আমাৰ পৰম্পৰা ।

কনিষ্ঠই জেষ্ঠক সেৱা কৰা,

জেষ্ঠজনে কনিষ্ঠজনক আশীৰ্বাদ দিয়া,

হিয়া উজাৰি  ইজনে সিজনক মৰম যাচিবলে আমাক ব'হাগ লাগে।

ব'হাগ আমাক কিয় লাগে ?

সুধাকণ্ঠৰ মতে,

" ব'হাগ মাথোঁ এটি ঋতু নহয়,

নহয় ব'হাগ এটি মাহ

অসমীয়া জাতিৰ ই আয়ুস ৰেখা

গণ জীৱনৰ ই সাহ।

ব'হাগ মাথোঁ বিহুতলী নহয়

নহয় ই নিশা ফুলা ফুল

ব'হাগেই আনি দিয়ে সমদল গতি

নেওচি জাতি-কুল

ই প্ৰভেদক কৰেহি নাশ।। "

মিচিং ভাষাত কণ্ঠশিল্পী সুৰুয কুমাৰ পাতিৰিয়ে মিচিং জনগোষ্ঠীক সোঁৱৰালে

Lígang émnamsé 

Po:lo amino:komang

Lígang émnamsé

Bírdug aminno:komang

Mising réngamlok sé

Asin a:pígé

Takam Misinglok sé

Asin a:ngé

 Sé ligangsé 

Asin mé:tinsunanéko

Mé:dírra du:yémílo

Asin mé:ponanéko

Gumrag So:mandé

Asin agom lunanéko.

ব'হাগ মানে অদম্য শক্তি 

 সুন্দৰৰ আৰধনা আৰু সংস্কৃতি ,

বিষাদৰ চিন-চাপ সমূলি পাহৰি

ৰঙালী চৌদিশে দেহে মনে সকলো আগুৰি

এইয়া বহাগ  মাথোঁ সম্প্ৰীতি আৰু সময়ৰ ৰথ 

নতুনৰ আৱহন মিলনৰ মধুৰ ক্ষণ,

সংস্কৃতিৰ নিবিচাৰে কোনো  স্খলন।

তাকে সোঁৱৰাবলৈ

সুৰুয কুমাৰ পাতিৰিয়ে এইদৰে মিচিং ভাষাত নিগৰালে

 Lígang dírbí du:tímílo

Mising réngam du:tíyépé

Lígang dírbé du:tímílo

Misíng a:ngo Katíyépé

Mímbír ya:mé:lol

Asin agom lunanéko.

এয়াই বহাগৰ অনুভৱ।

শৈক্ষিক পৰামৰ্শদাতা , কৃষ্ণকান্ত সন্দিকৈ

ৰাজ্যিক মুক্ত বিশ্ববিদ্যালয় সোণাৰি মহাবিদ্যালয় অধ্যয়ন কেন্দ্ৰ।

দূৰভাষ- ৭০০২৭৬১৬১৮