Gombéng Molung

                                                                                           Anuj Yein

                                                                           Ki:ni Ager Ajon MAK

     Gomugé bé:lendo, Gomugém tatbekdo, gomugém kabegmang. Gomug bé:lenko atí, atí agom do:yingé dung. Gomug gompir kosag bannyiko dung. Gomug ako tatbegnam bé:nam sém Gomug émdo. Akondé-gombug sidém abíkki adlenna ménam dokké porila:dag.

       Ngoluk mising agomlok lukampé gombugélang gombusé angudag, buluk lukéng kídí:dém mising gomlamlok dungkampé sémpé dung - se:kai jé:la gogdung, se:kai o:kai mandung, se:kai o:kai tupla bé:lénna bé:modung, se:kai a:líké alíng agom gomuglo jé:la ludung, gogdung édé appí:dém líkopé andé:pé gomug émdo.

      Dokké - gombugdé mising gomlamnok dung-kam, lukampé, abíg apir-pinnyi manggom bojeko ru:pumsula lukéng kodo:pé lukannamdém gumbug émdo.

Sipe - potin, gompir, agom, so:bo, so:ben, no ngo atí alí gombug dung. Dokké gumlamélang-gomlablok dungngampé lumílo abíg dokké - gombug-dé gombug-dokké gomyar, gomyar dokké - gomrang lendo. Édémpé aba:ko gomlamlok lugod luyar do:ying kadung.

      Émdaggomsin - sidé gomug-lenné, bé:lenné gombug-dé, gomug-gombe:dé kapé Ngoluk takam ríngam ara:lo kapé ainam-aimang atí atí gomukké lukanbipé mé:dung. Gomugélang gombugé bannyiko sémpé dung - tatponé gomug. Tatngernam gomug, sém sémpé lukan bipé - tu:lu mun-nam, dum-dum mannam, oi-ni:tom, kaban, a:bang édé bulum ídí:lai remi-jemi:pé sékripé bírdug po:lo - loke:lo írdí kétag-sula ayir - adí:lo tatpo-anpodag.

Émdoggom sidém a:íkisa:pé angupé tani:lok bé:len monam gomug - kídí:dé ngoluképé tatngerdag, taddírdag, sé:kai asin díkín-díkmín do:pé gomug émmímpé bé:namdé lukam gerjubmang.

      Démpila, lukanna lubipé, tatngerné gombugélang sé:kai dukan-okumlok maiker T.V. mobile, motorgari tatpa:dung. Dokkesin do:lung ukum kumdang, rí:síng - kokdang tani:takam dungkodo - po:rog, egé, aram-bati bé:nam, teubel ko-ko:néng írrad, so:bo - so:ben kamnam, yumé-longé adí-ayír kinma:pé ui-utpong kumnam.

Sidé monam írdí, élang gí:dí - sí:pí atí atílok bé:lennam gomug - gombe kídí:dé ngoluk tani:lok ségrima:nam gomugé. Édé bulum lo:dísém bé:lentíl du:mílo tatla tatnger - doddír-dag. Dokké édé gomug-dokké kili-kinma a:do, sipé - tani:lok yerung ru:benam, amide gukenyé, yummi-do:mi kamang, tani-otir-obiryé, dokké bígganok potino ludung tíngko dosibelok gomug bé:lenam lo:dém tatmílo tani:lok atí atí presar a:la dé:tabla otobla tani:yé sidag, sidé agomsém tani:adín - amír ka:sine doctor - kídaré-sin arro émna Lunam du:gingko lunamko kadung.

     Dépila - ngoluk taka:mé mé:jo mé:lamna méngabla lonying turra du:dosém sékriyo:pé agampé appíng régamé aine goukki, no-ngo tatla - anponé gomug - gombuki turyarla du:lai, no:ngo anu mo:díso anu-ager tarug ko:riko ri:jubla ri:gabla ru:bolai.