KARSOI

                                                                                       Mg.Bhobo Dole:

       Migomké abba no ro: lokké yumélo:pé tí:nam-donamdém mépaktobo.Édémo:pé ajuka:pé domí-tí:mílo nokké ukumé yogye,tani:dé ékéré ésa:ma:ye.Dumsung migmo kare:-ka:tagye.Asinang onmé kakuma:ye.Kétpagla du:daggom so:sa:né kaku:ma:ye.Takir sukkamge:la giyekuémna Karsoibí "bhutmah" dém títu: títu:la Maglu:mé ludung.Yerung kaman tani: émpé tatmang ka:ma:pé botoldok potikang pilen pilenna tí:la dung. Lékoda Karsoibi ludung- Ommangé mímbir ya:me ka:bo.Bulugom anyisudagma:lang.Apongém tí:daggom apo:dém tíngkosumam aimang.Tayummap la:néko pa:mílo oméséméi bipakpé ? Aoko yamnéko la:bipé? Émdoloi Maglu:bí agom -asog luma:pé kungke:dém gépaklíkto.Ru:nébí du:la tani:né:do gégaptomang.Karsoibí pe: pe: émpé kutoném bí gi:la gipakkang. Miksi ditung ditu:labi Maglu:kolopé kangge:la ludung-maurésin bomka:ma:namé .Tí:la tingkesula sipénélé.No sidaggom miksi apirko dílígge:mang.Tupouka....

       Tunggé:do tetsangge:kula lékoda "budmah"dém Karsoibí tipu:dungku. Aí aidé agom lula lula.Bídín-badanpé agom lula du:dardo do:lu:dok ma:m Lapídoibí gíadung.Kapikan yigna aí aidé agom lula du:n? Uyu kokki luposudu:ne ? Okokki...? O ma:mobiso:lo, gisa:to ... Tunggé:do tedadoloi karsoibí lusangkang- Ma:ma oko ru:nébí ru:tosong ngolum.Ngolukké miksi do:dí dítér katomang.Miksi-tanyob yonnusula éddiko apin doyen ? Yumé-ro:pé tíngge: tingge:la méntomilo ? Gétér géter gétomílo ngo kapé turyen? O ma:mom tatmangéida.O:ko lagika:n ? Lagimang ,serekidémna kopongkapé gídu:né? Ngolukkém lumangéibo.Kapé iyeji -iyepébo:pé émna ru:nékotopé tolíktung émge:la ma:modé darobla gídakku.Karsoibí típu:nam "budmah" kídí:dém soriyangkolo jí:ligge:la galug-gasor géma:né ko:kang kídì:dém yampo rokopé iskul (ICDS)do:pé gilangka émna goggo:dung.Amír i:dné néngémsin goggo:dung. Migomé binam ainé donamém domilo mogoj aido.Tani: ésa:la du:dag.ko:kang goggo:la du:doloi do:nyi allé létogla kémmo angkang.Kémokokki mimag monam léga:pé to:dílok sarakiko ba:noddung.Ommang kídí:dé:sin giangamdungku.Apin-oying yi:ledge:la doangardolo Maglungbi tingirsuge: la giadakku. Éi ngomyam mirémyan se:ko du:n ? Bí ngok tatkolo béttép lupénékon? Melok pelu kídí:dé ngolum apong tí:yoké. Ti: la siddi dinko ti:tobo.Su:pak tí:yoké ?.....Yungkér-yungér,data-damala ko:ba:dém gonggabla yuppakang.Karsoibi saraki rulenbomna ao-ommangé jo:bomnangkula soyardo yummodung. Odokké..... Do:nyi dongkong do:lendolo budmah soriya:dém bomna iskulpé (ICDS)pé gidung.Bím ka:dange:la galug-gasor géma:né ommang kídi:dé tangar ku:nam rokomdo dukkumsukang.Bí odo bulum ludung-nolu lo:dípé iskulso:pé gípa:ye. Lo:dípé donamémsin dopa:ye.Émpige:la sémpémang ? Kangkanpé ursuge:la,kangkanné galug-gasor bomge:la,lesin-laksin lotpu:suge:la,tukkulo tulang yonsula iskulsopé gípaye.Yampokolokké giyebon ? Ko:kang appí:dé giyebo émna toriksudung.Odokké budmahdém ako akopé orge:la mo:rum ni:tom (rastiya songgit)moge:la méligdungku.Bí:sin okumpé gípí:dokulo Maglu:bí ngom ngomaila bhumurang béngkampé bé:la dung.Éi méyumké tíngo:dé okola:n? Lomna la:leteiku? Édém andannai Karsoibí sorya:dé tunggé:do lé:sa:lígge:la tule:bari ara:do agom-asog luma:pé ing ganggo:la du:dodo Karmiké gasumdok murko:dé ri:bínbomkang.

        Karsoibí tubor oyi:dém osa:bomge:kula ra:ligdung.Alo-mírsí kígdubge: la jonte:danna omékumsudé doge:la amikolo a:m garrésukappé gidag.Atér aodé metrikdém pa:sge:la poraila:ma:la sennaibo ager gerkapé gínamé po:lo pumko ika:bo.Léko léko amik mobile ki phune modakku.Karsoibi lo:dípé gomka:-yekang tadla léko léko sibídgom aiyyé émna mé:dag.Ommang kídí sém otér otér oge:la turnam bélamko léngkanma:pé sinan lambém léngkannammém ka:pa:dung émna mé la gídolo mirém érang arigém gibaddungngaboi.Mé:dír-mé:song appí:dé omé kumsudé minné a:mé réngug gédopé, Péyyi-pétta: dé:taksudopé kabaném kabdung.Kumri-ko:ri agig rignèsin dagdí:la kangapkang.Anékumsudok miksi abungé ari a:mém jungab moto. Do:nyi kidusudolo tukkudo. ísingko odokké lambélok oyingko magobomnangkula ukumpé gipí:dakku.

        Do:nyi allé létogla mo:píso kémmo adolo pérogé rog-rogaidung,so:bo ombe: ombe: émna gídakku,kéno:la ege koye: koye émna kaptagdolo Karsoibí ukum pí:toku. Tangar ku:junam attar kídi:dém langage:la méramdo ími pargabdolo Maglu:mé pulice é mala giado.Bí oddar yungké yungérla giadungngakui.Okkosin emmoma:pé gari:do répsaligla gibokangku.Tadgo:nammé bi gésuné murko: (nokoli)monné émna ye:bomkangku émna do:lung musubdé kinmoto.Kaisoiké nappa:lok agomé yokpakkang.Aki:bo assé a:tokumang. Yumé yumbu:do omé kumsudé mé:dír a:nélo banggo:la amigéméi migjémnatomang.Buluk amigé po:ladla dung.Ardané rokpo pérokkídí:dé ki ki ri kiri émna urrobdung.Ardan mímbíré-yaméngé tung tung tangtang émna donamém ila do:nyi dongkongém kumríksudung.Tangar ku:junam lambédok minné a:mém é:butsula am gadné gada:dung. Mé:pon mímbiré oi ni:tomko, mé:dírné kabanko kabla arígém ir modung.Karsoibi milbo:dok légangé do:lucru:tum (gaubura)dém gibola gínamléga:pé goksudung Mamug sudange:la annyidé thanapé lendung.ka:namé éddín síkírdo tani:yegum ara:lo tumna lé:tung.Pe:gu o c dém luposudolo bí nokol poisang odokké apongé aipé tí:la dungkéng-yekeng dunggu:ma:pé idung émdag. Agomdé arron émna Karsoimė taddung.Odo bí apong ti:namdé arro émbito.Nokol murko: monamdé aropé lagimang.Bi ngok pa:nam murko:dém moríd morídla bomnamdé arro.Ngoluk nappa:lo:pé ka:la siloképé mélíkpoteiku sa:ra.Maglu:mé né:dok kangkolo léko tang émdopé pige:la silokolkké apong tí:yen tí man émna taudolo Maglu:bi ti:ma:bo satra émna yeru bisula lébi tumdung.OC dẻ odo ludung né:dok nappa:do pé.odokké.gaoburasé togė:la mélíktungku.Gikangku émge:la lékoda pipaklíkto. Maglu:bi pétu appun ka:sudung.Agom-asog luma:pé appí:dé gilendungku.

       Po:lo lédulokké Maglu:bí apongém ti:ropkangku.Ti:ligge:la né:démsin démbomkangku. Ommang kídí:dok amen aodé porina ima:pé ukumlo dunga:ma:pé ikang.Abin ko:dé Mumbaibo du:pagnammé ditag tangngoko ika:bo.Édilai édilai murko: apir-pirnyiko biligdungngakui. Su édémsin biliktokumang émna Karsoibi ami tatkolo ludung.Yumékolo Maglu:bi tí:batsula lamtékolo kétkakkang. Kédgo:douém luri:kolo ketkepkang.Tani:gísum giri:kangku Rongngam-pésamné tangar ku:pomnam yumédo kétpakla dung.Karsoibí toda todage:la apin doge:la yubdolo:pé giangkuma:la omédém gibola métungko kidgo: kidgo:la mala gidag. Apong koné takamdém urrob urrobla taddung.Akedé lubidung ngokkosokké koyubo gikangngku.Akondé ludung okolai li:runglo okepsula du:pé. Karsoibí édémpé lambé ru:nyi ru:nyi:dém penggo: penggo:la madung.Mabo-mayatsula ukum mapi:dungku.Pegom-peyomna magema silo sika:langka émna:sin luge:la kérang éra:dok ya:me ko:dém urrobla mabodung. Ka:namé Bapungké di:bang ba:lu:dok luri:do okepla sipakla dung.Karsoibí ki ki émpé kula kabropkang.Bik kamnamki kurí-dorí.kinsu amkang. Pérogégom ki ki ri kiri émna koksangkang. Tani: gikum-gipa:sula Maglu:mé yupakto.Dodgang émsin pupakto.Dodgang puro:dok léduloi atér omédésin amilo dukpakkang. Maglu:ké sirodokké do:lu:rongngamdung. Urrad ko:lad kakuma:la do:lungésin mé:po po:lung lu:dungku.

Abbu:démpé pagla sa:dung otér aodé.Draks tingge:la amiké motor saikelém dukté:lokké dugla tani: duglomduksomna dugloddag. Édém ka:la takaméi lubomdung aima:pé idu:bong émna lurobdung.Longékoném aodé tani: duktabla allém duksotto.Duksodnam tani:dé thanalo ko:dém kes bito. Pulis mago:bomna duksila du:namé po:lo pékéngko idolo pulis edgapto. Karsoiké turnyi:do yakan mukkangé yingkomoyangkang.Miksi sibugé buktikang.Ko:dém la:lenkunan lambé katokumang. Émdaggom émna O C dém luka:la ka:dolo bi lukang ten thousanko murko: bipa:ye. Édépag bím mélígyeku.Karsoibí okkosin émma:pé tupta pilíksula gidungku.Tunggé:do tedla du:dodo kerang érangké ko:dé kangko:la ludung.Ko:dém mélíktokuma:néi ma:ma? Boliyan ommangém ola sémpin ba:lagem pa:dung émna aí aidé lusudung.Éddíko murkong oklok pa:yen?

      Karsoibí jéngko:la ludung.Murkongko du:mílo bisupoi aso aso:pé bilatkupé.Agomdém tadla yigo Migomdé Karsoikodo:pé giko:dung. Karsoiké miksi dínamdém ka:la murko: five thousand ko bipé Émna togésukang.Édémodagom bomna lukikai émna Migommé gíbola pe:gu o c dém luposukapé gídoloi go:rum (jel)pé mélíkto.Akkéng po:lo lédulo mélígyeku émna pe:gu o c dé lubikang.Karsoibí mé:dír ga:nédo banggong banggo:dung.Miksi díjinna ukumpé pí:langkula tunggé:do agom-asok luma:pé dung.Édémpé aki:bo apin a:ma:pé, alí:lo así a:ma:pé du:namé lo:níd ko ika:bo.Tani:né:dé gi:sisilo:la ipagdung.Édílai édilai Migombí Karsoiké do:mir asin yingkomnammém morongkapé gídag. Do:mír yi:lubné mé:dírdo karsoibí kédbutsula dung.Longéla yummé lékodung.Bik nappa:dok

Koyemna yirnamko tatpa:tokumang.

 Po:lo pum lodulo mě:dír mé:nyoksula agomoué lendungakui. Apiném dolangkula ajjouko jí:sa:dungngakui.Mikkorok korogné amigde migjardungku.Ligangém okyabné singgi gipuné lí:jíg jigdodo réngam mé: poko mé:podolo thana dok pulisko Karsoimé mala gídung.Bí sé Karsoiké ukumdéi ? Bi ing émsidung.Odokké ludung -atér aomé mélíktungkunéi ? Pulisdé ludung ma, Karmug émna nokké aoko Mumbaibo du:néi? Karsoibí mé:pola- ing dung? Bí gidungkunéi ? Pulisdé lubidung gidungku.Émpige: la agom asog luma:pé kampon gasor tagrumsula gidungku. Okko émge:la Karsoibi kabbomdung.Pulisdok lukampé motor saikel éla:truk tummunsula sikang.Kumpani tani: sima:dém la murko: (sek)- lak aumko bige:la gikangku.Postmorton ige:la nolum simang émna murkong bigabyeku. Ngo lupangkapé gídung émge:la gíkangku.Karsoiké angké:do pítapakné ilíngko gégablíkto. Bí ngala:ma:pé ikang.Sakki sakkíla du:dolo do:lungé ospitalpé dugbomdolo lambédo sipakkang.

      Simang anni:dém lottado jo:píbomtoku. Réngamé o c dém lupa:to-go:rumlok du:né atér ao dém gogge:kula simangé yupagye.Réngam lukampé pulisé atér ao dém gibolangkula anédémna kaidém yupakto.Usi iro: lédulo bím gorum (jel) pé pulis gíbokangku.Odokké.....

Mising Agom kébangké 2003 dítagdo "Do:ying" émnam potindok lenné Karsoi émnam do:dé:dém moyinsula attenkunamé.