KOMBONG PO:LO YUMDÉNGKO

                              Tuniram Medak

Dumdum, Pempa be:namé

Ngomdung do:mir ésaré, 

Ke:dang abí abílo bígabla 

Anbego: kasuma:pé a:doku no 

Jo:jog appun punkolo.

Gipun-gatpun yalíngém boríksuge:la 

Longkobo gikangku Ligang miyumé, 

Ngengkud ngengkutsula daktog ésardok 

Otsur ni:tomdo nommíng me:pa:la. 

Kombong Po:loo yumdé:do 

Bottané ésaré dumíd urradla 

Gíyupsudoku lomdí díríla, 

Nok angkunamém ambegyemíloi 

Bi lo:dísiméi gidakku 

Turko amongém rakud rakudla,

Yinggon mukkang ayang makolo 

Me:pol dénggo:dag Singgi gimuré 

Abínné do:mír

Longé-yumé Kinma:pé

Se:kom annying annyi:la, 

Kapila Kabdosong So:yubí 

Otsur anné pongkogdo ! 

Rongngamné mo:téng arigdo 

Tatpí: tatsotpé tatto ngo 

mé:dír tu:lung mudnamko,

Bo:bi lo:lin ésardo

Asin pokím rankídag

Gíbídné ayirdok mé:pangko.

Jegréng tapung mtkodo

Aríg iné yai bulu

Asin rongngam pésamé,

Mongku arígo:lok ma:nyi:dé

Sinyingo:gom ase:ma:mílo

Mo:píséi ramla du:ye.