Lo:dém Mé:pol turnané lambé

                                                                                                      Newton Pegu

                                                                                                      Jonai, Dhemaji

  (2)

Anondosondoro agorwalabí(Ananda Chandra Agarwala) aro: agomko luka :-

      "সুখ সুখ বুলি মানুহ বলিয়া

নেদেখে সুখৰ মুখ

সুখ বিচাৰোঁতে পায় সংসাৰত

দুখৰ উপৰি দুখ।"

      Appíng taniye mé:pol turra du:lí:dag.Mé:pom pa:nam léga:ngé mé:pom mala gídag.Sulli pota pongkokdok así maka:mémpé mé:po:dém magol gídag.Sidé mo:písok mé:pom mala oko arré:sin kamang.Mé:po:dé ngoluk asin ara:ngí:bolo dung émnam agomdém ajjok tani kindag.

         Ngo atsa dodo:bongé atka ngok amikkí mé:po:dém ba:nyikopé topansula:dag.(1)Amír kané mé:po

(2) Asinbolok mé:po.

Amír kané mé:po:dé tani lédílo du:yarra dupén mé:po:mang.Asinbolok mé:po:dé:pag lo:dém du:yarra dupén mé:pon.Asinbolok mé:po:dém sogabgé:la:pak taniye mo:pí:so lo:nyiko turra du:dakso lo:dém mé:pol turra du:la:dag.Émpigel símsí:ro taniye amír kané mé:po:dok lédílo dugmínkolo asinbolog mé:po:dém mitpandungkung.Émpila taniye lo:dém mé:pol turnané lambé:dém pa:la:map idag.

      Sidé mo:di:so édémpin taniye dung sé:ko:bulu okumdé donam-tí:nam okko:sin kamang émpigel ambí:ném kodaggom biri,sigaret,potika,apong atí tí:ye.Kapila émyemilo édémbulum tí:la ake-ake taniye mé:pom pa:dag. Okumdé okko:sin kamang émpigel amo:ngém bondokpé lé:daggom,lun langgé:la EMI dorpé:nampé idaggom baik(bike),DSLR,TV édémbulum rédag.Kapila émyemílo: taniye ammem léngkanna aipé mé:dag,mé:po:dag.Émgila odogbuluk pa:nam mé:po:kidí:dé lo:dém du:yarné mé:po:mang.Odogbuluk pa:nam mé:po:kídí:dém asinbolok mé:po émna lumang.Kapila émyemílo tani ako baik,DSLR,TV kamanggon mé:pol turra du:la:dag.Tanidé mirem manggom asindé miremgel lo:dém mé:pol turra du:la:dag.Éddí:koi taniye miremdaggom asindé miremmam lo:dém mé:pol turra du:la:mang.