SIDO A:NÉKO DU:YA:MÍLO

Tuniram Medak

Sido a:néko du:ya:milo

Pédongé, pu:mu asilo,

Durbutsula ursuya:pé. 

Yulad yuné ésaré

Mukkang apomko goksula,

Anseko sebo suya:pé. 

Asin benma:ya:pé attung attu:pe,

Sakkebné Kénongém

P:olo ríga:lo yogmo ma:ya:pe.

Aín émpin ariglo 

Émé ugné amigém,

Miga:la ka:mo ma:ya:pé.

Sido a:néko du:ya:mílo

Mímbír aríglok,

Inggango:né pokídok 

Angkir aré yokpag ma:ya:pé.

Mé:bo mé:mín sunamlok

Ayir gípí:man ngasoddo

Tumbo tapungém mudmo ma:ya:pé.

Sido a:néko du:ya:mílo

Ago go:rung yirnamé,

Turnamsém rotpag ma:ya:pé.

Opan pékog koga:né,

Ru:bené arígo:lok yirnamém 

Édílo:sin tadbeg ma:ya:pé.