RONGANOI
Jiten Noro
Írdí longumdo kunna lé:to geyomko:lo.
Alagdo toríksula tamlento ga:né néta:bí
Lo:lé ni:tom tomsarkolo.
Ni:tomdo turropkangku siné ongo kídí:dé,
Raggo pé:tumnam gejígné ma:nying kídí:dé.
Ko:ba:dok barsa:la sangangkang
Leke: do:yi:lok jolkuori:dé.
Aín bí:ríg ri:yitki
I:yémpé lígírkang bittérén kama:né a:nédé.
A:né asido yuri: yu:manna ringka:l ka:to
Naré:pé sí:sa:né pídbín bírínné asindém.
A:né rékamé ngoluké du:téngé,
Turpo-turdírdok ngoluké ajoné.
Bík léppírém síggabla ngolu
Dírbí-dírlab alamém lambompé mé:do,
Anu bédangko sígbopé mé:do.
Bík díngomné díyíngé ngolum usa:dag,
Lékoném aglíng kuyagla okum kumsungém pu:yuddag.
Émpidaggom aipé mé:bomsunamé sé a:nésé.
Adi-aying molusula
Biyyar biyyarla bidla dungkangka
Éi ngok mé:bomsunam a:né Ronganoiya !
Doksiri দকচিৰি, ফেব্ৰুৱাৰী, ২০২৩
No comments:
Post a Comment