ANG

Dr.  Arindom Prince Panging

Gomug muglong ngoma:dung 

Takamém kammoné ésab mé:dírko 

Kogli ogliyamna lambé bélamé yoga:dung

Kémolo sipiyang ikiyé radung

Lolad latko lottalo

Tatpamang réngam gomug

Ka:pa:map iduson sísang ang

Sortiyalok répagnam potolongémpé

Así aré oríng kama:pé irobdung

Émdaggom so ayyob bidné né:tako dungngai

Méyum mé:rompé kígodung su 

Dírpen dírrenné taléng okumlo

Dígín gínsala jinnagdung

Opan panné bíro bírma:lok adín along

Tér téraila aiyesin jinnagdung

Amír míryadla ansíl ramnamé dolungé

Míjíng jínga:dung sagí gíné asagé

Abíngé dorrong dírnémpéi mé:ségé

Gé:roblaman bírémdémpé yame: me:poré igodung

Réngam ngamsané nésin néro ro:ayirlo

Pakkombí íngíd íngídla réngaddung adi: di:télo

Asin kigosula yaméngbí kabsa:do

Ko:bí gíté:lo doréko itasudogai

Yírra gínébí sima:pé ikang kapiyan réngama 

Sekomém métinsuyan su?

Akkem yula:to

Akkem yula:toma:

Akkem ka:píto

Akkem ka:píla:toma:

Koktolog kampon gasorém ka:tupsulama:la 

Ogo baggola yamé:bí simínpé ido

Ojíng ommangém kabnam ka:yené

Írang kumda:lok miksi dínam ka:yen?

Toku ta:tok ago golu:lok

Sa:lenné nésin nérobí

Yayoké í:lam abe:dé ésarlo sargola taudo

Sísanga nolu turdun

Sémpé réngam turredyen?

Kapikan silo

Sísang ang gomug gomnamé katokumang

Gomug gomman taniyém

Yegumlo murra lambém mitpan sudo

Turlam alam me:dír dírse dírrelegla réngamé kappa:do

Réngamé kapdag lédulo

Sormon miksém sémmanyo

Amme yírka:yepé nom

No tani: aoko

No donyi:-po:loke ru:namko

Sísanga no miglu:yo

No ru:beyo

No lube:yo 

Ayo yeper persa:to

Lupénam lubomto

Mapénam mabomto

Pa:pénam langgapto

No ang kanéko

Nom mé:tinsunamko.

Doksiri দকচিৰি, মাৰ্চ, ২০২৩