AJJOU:PÉ YAMNÉ LANGGEL

Dipkesh Kaman 

  Siyum sírok migomlog ru:lamé 

  anying kandopé aimang 

  ajjou:pé yamné la:ném makanalo 

  tumab bomdung,dungkéng so.

      

 Anupé sí:ta sí:mal sísala 

 asiném méngkinsu:mala 

 punbugné appundémpé punsadung 

 ajjou:pé  la:dung,Ajjou:pé gídung.

      

 Ayirsé aiman ésarko sarabomdung

 édé ésarso kinma:ném kinmodung,

 kinnésin monba:la dungkubong. 

 Kapiné ésarén siloson kinnaman?

    

Rou-yumédo oying apin ké:l migmo

yakan me:re émpé yakkamdung,

Donyi-pododo dagla rigu mo:lamal 

migmo líla miksi titsul kabdung, 

ake:é ané abu okumpé gíladdungku.

Ajjau:pé yamné langgel yame kílidé

érang do:bo tí:bonam légangé

ao:dém gé:mo bombo:nam légangé

pagbo gíkapé moté molégpé

ajjo ajjou:pé gídung

Sé dungko:sém mé:pakdanna.

Doksiri দকচিৰি, জুন, ২০২৩