সম্পাদকীয়

 Nébíngké Lupénam সম্পাদকীয়......

Poyirnané Agompé Ané Agom éla: MAK-é Gerpénam 

(শিক্ষাৰ মাধ্যম হিচাপে মাতৃভাষা আৰু মিচিং সাহিত্য সভাৰ কৰণীয়)

"Na:néké otélígnam agomé

Tatpoi tadané, lupoi lungadé

Misingé émsuge:l

Kapé luma:pé du:yené

Misingé ngokké ané agomé"

     Mising opínsok bottayapagné agom gomlab mibang "Mising Agom Kébang"-dém dítag 1972 do ba:lendokkébo mising agomsém pu:po jarpo:monam légangé agom agomlab agerém MAK-é gerbomtíla dung. Anéké agomsém nappango:ki lula/adla du:mapé migomém runggo ara:lo tolígmogela agomsém turyarmonam légangé 1979 dobo Mising Agom Kébang-ké runggo potinlo kangkanpé luuntung Mising ané agomsém pogo:lo poyirnané agompé inam légangé agerém kínggípé gerpaye. Dok lédupésin Opín Kébang TMPK-é dítag 1984 dok 5 Me: longkído aíké agom gomlab, dírbí-dírlab, yelam atí atí légangé asom mimongém 14 kopé binam mé:pa do:jiglo lupodanna do:ri mola lutung - Lomdanna pobug pogo:lo mising ané agomsém poyirnané agompé tolígrubipaye émna lupangka.

     Odok lédupé misi:lok kinné pa:né pinnyo burné ope:é "Poyirnané Agompé Mising Ané Agom" dok léga:pé lupo-lujar agomki lumík-lusikka:mínsugela:sin mising agom kébang lotta: ara:lo dítag 1997 do gogamukh-lo 15-02-1997 longkído "Relevancy of Mising Language as medium of instruction" lutégla lupo lujar agomém luposuka. Odokkésin MAK-lok milíg kébangé Expert Group lédulo luposugela bulukké luyirkampé opín kéba:lokké ru:tum migom kídíng, pinnyo burné, kin-go migang lédulo arang agomém lupítka:mínsugela bangke agom kéba:lok míngkínam agomém tíkumsugela mising agomsém pobug pogo:lo poyirnané agompé la:nam-la:manam agom kídídém odokké misi:lok kinné pa:né kídídok luyir agomkídídém tíkumsugela "শিক্ষাৰ মাধ্যম হিছাপে মিচিং ভাষা" émnam potinko dítag 2015 do MAK-lok nébíng Kalinath Panggíng-bulu la:lenbitung. Odo potindo mising agomsém poyirnané agompé imílo okodé aiyen okodo aima:yen édé appíng agomém adlenbila métung.

   Silo so: ngok lukapé gínam agomdé po:péké agomkídídém lutenkunammang. 1997 dokké silopé 2023 so:pé dítag 26 kopé poyirnané agompé mising agomsém pobug pogo:lo tolígmonam légangé migom lédulo MAK-é ngarasumaru:pé mola du:nam mimagdok aré:dém pa:lennam do:yingko lupé idung. Gogamukh Rotneswor Perme Lotta:lo ba:nam 24né tagum mirum kébang éla: aín bí:ríg ba:sub tarung kéba:do misingképé airupé ainé lutatko pa:dunémpé mé:sudung. Ayar ayarpé mimag monamdok aré:dém silo MAK-é pa:dung émna mé:sulanam bélamko lendung. Kapilané, ngolu MAK-é oko taru:dok légangé gogamukh lotta:lo lupo lujar agomém luposukaji édémíng 29-05-2023 Me: longkído "Poyirnané Agompé Mising Ané Agom Éla: NEP 2020" lugéngki lupo lujar ager tarungém iletto.

  Pobug pogo:lo poyirladopé mising agomsok gerpénam appíng agerém geramgela:sin atsonsunam ager tarungémsin édílaibo geramtubong émpigela asom mimongé toríksuma:gangki silopé aíké mising ané agomsém pobug pogo:lo poyirlamapé ila dung. MAK- anéké agomsém "Medium of Instruction" pé migomé tolígdanmíloi pobug pogo:lo poyirladopé agerém gerpíttubong. Odok léga:pé MAK-lok po:péké Abu Gubindo Taíd, Nébíng Dimbeswor Dole:mé agom mé:boné appíng mising réngamé asé:líkpérung lagiye. Bínnyikké ager tarung ara:do sé irga:né ager ako.

   Asom mimosok ru:tum mirung Dr. Himonto Biswo Sorma odokké kin-go mirung Dr. Ronuj Pegu bínnyim MAK-lok kéba:lopé goglígla ainé irga:né lupangko lupamonamdé:sin po:péké Abuké la: nébíngké toyumpénam ager tarungko. Gogamukh Rotneswor Perme: Lotta:lo ba:nam Mising Agom Kéba:lo mising agomsém poyirnané agompé pobug pogo:lo a:péné academic session-dokké poyirlayebong émna mising réngam ara:lo ba:lampé asom mimo:sok ru:tum miring Dr. Himonto Biswo Sorma odokké kin-go mirung Dr. Ronuj Pegu-bí toríksugela:sin MAK-éla: SCERT-é dumsula pobug pogo:lo poyirpénam potiném 11 kopé ru:tum miru:dé tamsarto. Édé mising agomképé airupé mé:po:pénam agomé kapila:né odokkíddíné i:dné agerko migomé togésunamdé arorupéi mé:porupénammé.

 Su:kolokké ané agomlok mising ko:konéngém poyirpayekubo. Airuné agomé. Ané agomlok ajji:né ommangém poyiryemílo lomdanna oinnyo:ésin burdo émdag odokké lomdanna agomémsin tadgabla ménggablado émna kinné pa:né pinnyo burné tani:é lugé:la gítung dokké NEP 2020 -ésin ané agomlok poyiryemílo bojerungko ko:kangképésin aido émna lubitung.

   Poyirnané agompé mising agomsém ba:lampé tolígdag lédupé MAK-é gerpénam agerékké - Mising du:téng pogo:kídídém migomongngém tolígma:pé MAK-é opín kébangém jonsula ainé poténg du:téngko bipé lagiye. Siyum si:ro TET mastoré mo:té mo:télokké ngoluk mising du:té:lo poyir abu:pé ila dung. Édébulu mising agomémém lukinma/atkinma. Édé lukinmané/atkinmané kíríngém la:sonsugela mising TET mastorkídídém langangkunamko ipaye. Ékémam "Medium of instruction-pé toríksunamdé agompé du:pagye, agerpé yokpagye. Odokkésin ro:yampo:pé mising poyirném anupé langanam légangé migom lédulo luposugela mising TET patinam ager tarungko ru:seggela anupé MTET(Mising Teacher's Eligibility Test) balennam ager tarungko édílai édílai ipé lagiye.

  Mising Agom Kébang-é yampoarkokké mising du:té:lo mising TET masotoré poyirpé lagiyé émna mé:domílo asom mimong lédulo luposugela "Shiksha Setu Assam" portal-dok record-dok dungkampé ngolukké misi:lok TET mastor kídídém la:sonsunam ager tarungko gerra:do. Ngasodé a:mangaudopé ainé ager tarung ru:bídnamdé ainé opínnok ageré. Mising agom, mising opín odokké anupé sí:sané ajjo: ajjo:né ko:kang kídísok ainam légapé ngolu pobug pogo:lo aíké mising ané agomki poyirpérung lagiye. 

Mising Agom Kébang Írroi

Mising Agom írroi

Sa: édé:bo

Tapan Lal

Nébíng

Doksiri দকচিৰি