LO:YID MO:BO

Dusyonto Noro

   Péi-Péttang, E:g-Porog appíngémyang tani:ém mé:jongarya:dopé ru:tag. Odok-ki appíng tanié méngkinsudag. Tanié kekonpé kesakpé lédupé me:lampé kapiné agomé a:yen édé appí:dém topí:sula: ngolum tanié émdang. Tani takamlokkéi ayang a:boko dung,réngamsém asin onamko dung. Réngamsém asinang onamdok-ki tanié mimagém mola gídung. Édé mimag moko ara:do sé:kai sidung. Édémpé réngam léga:pé mimag mokolo siné tani:ém “lo:yid” émna ludag. Lo:yid bulum kumgésuko amo:dém “lo:bo “émna lula:do.

    Ngoluké Ohom mimongso Moniram Deuan, Komola Miri, Mukondo Kakoti, Konoklota Borua bulum lo:yid émna ludag . Kapila:né bulu sé Ohom mimongsok légangé mimag mokolo sikang. Boru odok-ké atí atí réngam ara:lo:sin agom légangé, dungko among légangé loyitpé gíné tanié bojeko dung. Lo:yitpé gíné tani kídí:dém mé:pangkunam légangé appíng tani réngamlok kéba:bangko bangkolo kumgé sunam ager tarungko idag. Édé agerdém sé mo:pí:so  lo:yid mo:bo kumtom émna ludag. Sé mo:pí:so lo:yid buluké dungko amo:dé appíngémyang tayongé émna lupa:yé odokké:sin buluk ager kídí:dé appíngkémyang aré kaya:dag. Buluk arédém ngolu édílosin biladlangkumang. Bulum kumgésuma:mílo,mikpanmílo ngolu édílo:sinéi kinné-pané réngamémko émna a:ng pítapé mé:sula:ma:yé. Do:píném kinma:mílo su:pag ké:lang me:lamké agom gamikdém kapé tílenyen, Édé gamikdém tílenla:ma:mílo no-ngolu kapé kinné-pané tani:pé iyen? Agomko sémpé kadung-kapiné opíné bi:rém puja bikenma:ji édé opíndo bi:ré jonamla:mang.

   Noresh Taíd, Boga Médak odokké Onjona Pe:gu bulu Mising réngamlok lo:yidé. 1995 dítagdo 21 Epril longékolo Lokhimpur mo:dum ara:lok du:né Bilmukh poti:do ba:nam Ba:né Kéba:lo réngam léga:pé bulu pulishlok amnam guli:lo sikang. Noresh-Bogaké sidag lo:nnyi loum lédudo mimé Onjona Pe:gu-bí sikang.Édé 21 Epril longédém dítag dítaglo “lo:yid longé” émna ngolu ba:la gídung. Édé longédo takam Mising réngamé bulum mé:pa:langkula lo:yid mo:bo kumtomko idag. Noresh, Boga, Onjona buluké lo:yitpé sido adído Takam Mising réngamé miksi:ém pé:ri-pé:ripe díla kabno-noma:pé kabto. Odo adído mopun ope:ésin lo:yid buluké légangé miksi díla dínga:suma:dopé ni:tom anu ni:tomém molenka. Odo adído takam Mising  réngamé buluké arédém biyerungko émna pesuka. Odo adídok agom do:píndé Uyupé gíné Pobitro Miliké monam anu ni:tomdo naréngo:pé podlendag. Édé anu ni:tomdé su:pésin anguru:pé réngamém asinang omodag. Odo adído bík monam anu ni:tomdé sémpé- Boga Médoga nom mé:nyogmang réngamé/Noresh Taída nom mitpanmang réngamé/Noluk le:né i:dok ngolu takam Misingé arédém biyérung, pesudung pesudung pesudung.

    Aropé longékolo lo:yid buluk arédém biyerungku émna Mising réngamé pesuka. Bératsula Ka:mílo édé pesunamdokké silo lo:pé dítang íying annyi aumko ika:bo. Mé:mil ka:míl odok pesunamdé pesunampéi du:pakkang. Pesukampé Mising réngamé agerém gerra léngkan la:tomang. Édé agomdém Mising réngamsém gígur-daggurboné ope:é aí-aíém tausupénam agomko.Ngoluk léga:pé siné tani kídí:dém ngolu okolo kapé lé:pé lagidang?Bulum ngolu lo:dísém mé:pa:l du:pé lagidag. Buluké ago-mo:boém lo:dísém naréngo:pé mopul lé:pé lagidag.Migom okum lottalo bukuké mo:boém mola lé:pé lagidag. Odolo Migom okum lo:pé gíné tani takamésin bulum lo:dísém mé:pal du:la:yé. Odokkésin Migom okum dungko ara:lo buluké moimangém lé:pé lagidag . Lo:yid buluké jibani Potiném adlenpé lagidag. Odolo anu-anupé sí:sa:né ope:é buluk do:yingém pola kina:ye. Lo:yid buluké do:píném takamé kinpa:ru:ye. Buluk dopíném kima:mílo  kinné opínko émna luma:ye. Dítag dítaglo long-ngokolo bulum mé:pa:l du:namdé ainé agerpé iyelang?Lo:dísém bulum ngolu kumgésupa:ye.Bulum Uyu amo:bo mé:pol du:monam légangé ayang-a:bo ka:mínsula ngolu takamé réngam léga:pé agerém gerpa:ye. Lo:yid buluké mo:bo oku:mé kapé dun? Aima:pé du:mílo ngolu kangkano:pé mosi:pa:ye. Loyid buluké ao-né:ng-omang, Bíro-bírmangé kapé du:n? édém bulumsin ka:pa:ye. Okum-rínggo léga:pé lo:yid buluké gerpénam agerkídídémsin ngolu togésula gerpa:ye kapilané bulu ngoluk léga:pé:pag sige:l gíkang. Lo:yid bulum aropé ngolu aya:dumílo buluké ope: né:ng-ommangémsin ngolu aiya:pa:ye. Buluk ope: né:ng-ommangém aya:namdépag bulum aya:nampé iye. Agom ako sémpé dung-Bhimmé manimílo bík godadémsin manipa:ye. Lo:yid buluké amíném,mé:lodém oino oino réngam ara:lo:pésin boma:pé lagidag.Odok lígangé dítag-dítaglo “International/National semiar”ém mogur-igurpé lagidag.Lo:yid bulum mé:pa:nam légangé no-ngoluké asin ara:bo bulum punna du:né appunpé punna du:mola:ye.Migom ope:é aí:aíém mosi:sunamdém mé:ma:pé lo:yid bulu kapila réngamsok légangé sika:ji édé agomdém lo:dípé mé:pa:la agerém germílo ngoluk réngam sé pu:po jarpo:ye.Ékíma:mílo Mising réngamsém kémoné mukkangé yi:luppé bojeko adíé lagima:yé.