MISING AGOM  É:LANG SILOKÉ  ADÍ

Bhaigeswor Pogag

Mo:píso opín ako turradu:pé appíngém-yang lagiyabannam attardéi a:ng ara:bokké buglenné agomdé. Agomé kama:mílo mo:píso opín ako  dung émna kangkin sula:ma:ye. Ngoluk Bharot morumso bejeko opín-olungé du:ng.Édé opín-olung kídardokké appíngké agomé turra dung émna lulama:ng.Akke opínlokké agomém lusuma:pé ami: agomém lukolo, bottané - odokké luya:bannam agom Kídardém lumín kolo aíké agomdé sipagdung.Ngolukké Asom mimo sok du:né Ahom, Sonowal kosari, Moran-Motok kídardéméi ka:lado.Buluké agom, kídardé mo:píkké kapé  yogla gíkaji.Luku mapé du:dom mo:písokké yokpagdung.Édémpé 

mo:písokké bojeko agomém  lunné kakuma:la yokpagala gídung. Ngoluké Mising agom sémgom luné,adné lang poriné ka:ma:mílo longékolo mo:písokké  yogma:yé émna lulamang.Sé agomsém siloké sí:sang gí:sané ko: ko:néng kidaré asin odanna mosi:ma:mílo aropé mo:píso Mising agomisé turra du:lama:ye. Sinyingké 2021-22 dítakso MAK gé ainé bélamko Sigbodu:némpé Ka:dung.Pensando Dibrugor lang Guati I:nibharsiti arango:lo du:dom appíng porikapé gílamangai.Édé university kídardo:gom poripé seat égom bojemangai.Sinnying bangke bangkelo poyirbonam ager tarungém la:namsé  Mising Agom Kébangém gaipe koyit pénamé.Sé ager tarung sokki do:lu:lo du:né  opanné ommargété porimín-la:yé.Porinégo:m bojeko len-ye.Supag ka:namé poyirko okum kídarlo dungko  dakko kagémapé poripéné lendung.Sémpé Mising agomsém porilí:né lennamsi   Mising agom légapé aipé ainé do:yingé.Mipag agomlok poyirla du:né Mising mastor kídarégom asin odanna agomsém poyirsudokupé ka:pa:dungku.Yutube facebook kokkigom Mising agomsém poyirnam agerém gerné asagé gerbomla dung.Édé agerdokkigom Mising agomsém mo:písok takamém Mising agomsé turné agomé émna amme kinnaye.

Ainé aine yutube lo ager gerné kídarété Mising agomsém aiyompé kinsukupé  émna me:la bulugom asin odanna poyisukolo lendung. whatapps group lok admin kídkrégom Mising agomsém adyir poyirnam légapé ager gernamém ka:pa:dung.So bo-jeyang poyir sunné potiném répé émna mé:dogom ngasoddopé ka:pa:dung.Agom kébangé selebaslo  du:né potin kídardém répété pa:mang.Mising Agom Kébangé potin kídardém lomdanna tupjedlangkula  bangke bangke lo:pé ornamko ilamilo aiye émna ngo mé:dag.. Tíkum nam potinko Daktor Ghano Kanto Dole: Sair bí la:lenbidopé Ka:pa: dung. Édé potin dém  lomdanna bangke takamlo:pé binam agerko gergolangka.Do:lu:lok sentar kídaré 15/20 ko potiném, répé mé:pénampé idag. Émpila tíkumnam potindém pa:lamílo buluképé aiye. Mising potiném bojarloté pa:lamang.Do:lu:lo dunggela:sin akke Mising agomsém poripé émna mé:né dung.Bulu Dibrugor-Guati gí;a i:nibharsiti lo du:la porilamínmang.Agom Kébangé aipé agerko gerbodung.Émpigela agom kébangké an-ka la:la sartiphiket binamdé i:nibharsiti lokké binam sartiphiketddé akamyenéi akam ma:yen? University dok course dém University Grand Commission  recognized inamé.MAK dé organizationko.MAK é kéra:pé poriné kídarké légapé mé:no:sula germílo aido.Yampo ro:ye poyirsuné kídaré ngasod pa:ngkupé lagimang.

Mising agomsém kapéi ila medium of instruction pé ibomílo bojeko poyirboném lagiye.Odok légapé amilo gíma:ngo:pé ségrék sumso sula lé:nam kísapé ngolu poyirbopéném mono:la lé:nonamsé aipé ainé agerko.Dagdung daktok,kekon kesakpé su Mising agom poyirsunno:pé ka:pa:dung.Sé Mising anéké agomsém mo:píso turyar du:bonam ainé moimangko émna lulado.

Anupé lusadla poloddém ka:name asutko ngasod kadopé ka:dung.Émdaggom kébangém édé du:né ngasod kídardém pobukpé posa dagdokkébo na:répé mopu:suma:mílo me:lampé ame:né tarédé bottala gído.Abukpé buksa:ngo:dagém gompí suma:mílo aima:pé ilanggom ido.Sé:kosin mé:mur mé:mínsuma:pé luker kermínsuma:pé atí ngasot du:mílo du:pumsula motén ka:tén langkula moin mojosukupémílopag Mising agomsé ané agompé ila mo:píso du:yarye.Sémgom ménggappénamé abíglok dumsigém anu anupé moténtíla du:mílo Mising agomsé oji:ngo:pé itíla du:ye.Supag kídar ngolu anu anupé abíg polod adlodém moténtíma:pé éddíko paglayeji déddíko potin adlenam agerém gernam ager tarungém la:laju.Mising potiném open bojarlo pa:lado:pé odokké apíngé pa:popé pa:ladopé MAK é ibopémílopag poriné len-ye.Déma:mílo Mising agomsé oji:ngo:pé itíla du:ye.