MITOM

Someswor Medak

Mitom asin aréido 

Mitomké asin ansido 

Aro agom ludo

Turnan lambé léngkando

Segrépé du:nané 

Alam  mado

Riyappé dagnané 

Do:ying kído.

Ka:nying ka:soném 

Kangkano:némpé addo

Opan- mirem mama:do

Appíngém ménggésudo.

Mé:lod ilod

Kangkano:do, aipé mé:do

Ajji-botta

Mama:do.

Bortan do:murlo 

Dénggo dénggodo

O:ríngné ga:nélo:sin 

Durgo durgodo.

Yumrang si:lung 

Durgo durgodo 

Nampo-namying appunlo

Dénggo dénggo:míndo.

Néi néngan ngankampé

Ngansamíndo

Singgi gimurlo:sin

Yinggo:míndo. 

Yaka-yasing,

Kogoné émna sigmado

Midumém lo:dém 

Midumémpé ka:do.

Takamém aipé mé:do 

Appíngém boríksaudo

Asin lottalo bobomla 

Ainé ma:nying ma:do.

Doksiri দকচিৰি, আগষ্ট, ২০২৩