NGO JO:RÍKSUYÉKU NOM

Jiten Noro

Jo:gdo pongkang

Payegdo pinkang

Ékkamdo sítír namsíng kunbomna

Yilélok mo:nu amo:do

Nom lelígla gítakku

Kangkanné miglam kísapé.

Jarkub jarrabla

Biré birkurla 

Tommanna du:lang

Gené oini:tomko,

Rémagné mukkangé yí:manko 

Do:mír rumkí:do. 

Létum tumna du:né a:né díngomdo. 

Okum bare:do níksí:la lé:nam

Mé:bomsunam kasédém bomna

Ngok lula:ma:nam oini:tomdém

Nabberdo umbomna

Térém po:lodok

Singkin mindí longéko:lo

Nom gatsíngkakupé oiséngbulu gíyépé.

Írga:né do:nyié amturnam

Aínpé unko arígdo:pé 

Sotoritya:né dangori: ba:rdé 

Tébég bégdaggom

Jongkolo ngokké 

Gordungé bégdaggom

Síríg-síríg torídém tomlam kadopé 

Ngo jo:ríksuyéku nom,

Ngo boríksuyéku nom.

Doksiri দকচিৰি, অক্টোবৰ, ২০২৩