আঘোণ
প্ৰিয়ংকা টায়েং
কুঁৱলীৰ ওৰণি টানি
আঘোণ নামিছে
বুকুত বিজুলী খেলি বিৰিঙিছে
এধানি প্ৰাপ্তিৰ হাঁহি।
সপোনৰ শইচবোৰ সেন্দুৰীয়া হৈ
ধৰা দিলেহি চকুত
নিয়ৰৰ বৰষুণত তিতি বুৰি
জুৰুলি জুপুৰি আঘোণৰ মলয়াৰ শীতল স্পৰ্শত
জুৰ পৰিছে হৃদয়খন।
পকা ধাননিৰ বুকুয়েদি বৈ অহা
ৰিব ৰিব মলয়াৰ স্পৰ্শত
সিচঁৰিত হৈছে,
সোণালী ধানৰ সুগন্ধ।
জোনাক নিশাৰ তৰাফুল আৰু শুভ্ৰ জোনাকে
প্লাবিত কৰিছে সোণালী পথাৰখন।
অলেখ ভাৱ আৱেগৰ বোজা লৈ, আঘোণ আহিছে....
আহি থাকিব
অনন্ত কাললৈ...।
ঠিকনাঃ প্ৰিয়ংকা টায়েং
শ্ৰীমন্ত শঙ্কৰদেৱ বিশ্ববিদ্যালয়, নগাঁও
অসমীয়া বিভাগ
Doksiri দকচিৰি, জানুৱাৰী, ২০২৪
No comments:
Post a Comment