GINMUR PO:LO NOM KAPÉ BORIKSUYAN

 

GINMUR PO:LO NOM KAPÉ BORIKSUYAN 

Migang Mitradev Pe:gu

Lakhimpur 

Bising po:lodok ku:né tapamém dursurge:la,

Gené bírduglok do:jígém í:r-pongkírpé bombila,

No lékoda gílatdungku.

Yubgu: yuba:mang

Dungu: dunga:mang

Píyangé pígorman yuméso

Apígé kidag,

Miksé dídag

Akiyé ukdag.

Ginmur po:lonom 

Kapé borígsuyan?

No mé:dagnei 

Ngo mé:pola dung émna

Nom ngo kapé lubisuyén,

Ményi:ngké adí-dítag akondok do:yi:ngém!

Édé bidosto:do 

Adi-among lédílo,

Ba:bumésin bitbomkang,

Mo:písé kémokang

Ngo atéré térpakkang.

Kike: ramke:né owe mé

Amikolo pakné gíla turbodung

Ginmur po:lo 

Nom o:kokki borígsuyan?

Ampi-purang apinki bo:rígsupésin 

A:m kumsung katomang,

Asi-among katomang.

Mé:bo ni:tom kokki tomrígsupésin 

Ni:toméi kabanpé edag,

Kablíng réngadé ngadsa:dag,

Miksé pédo:pé odag.

Lé:no:dém ber-beraila

Dumdumdém dob-dobaila démpésin

Ményingké lí:gado manpetto.

Ginmur po:lo nom kapé borígsuyan?

Ginmur ésarésin ngok ngasodém yubomla:mang

Ísínglok anné ori:gédag,

Do:mírésin Jo:lang gémang

Do:mumla mukkapé idag.

Édílai tawkítan?

Anné kama:la ngasarsuma:pé 

Tupta pijunsula du:né sítu:dém,

A:m gatrukko sanpakné 

Kéyungné arígdém,

Nok gíko lamtédok 

Ori:la du:né ma:nying yokné 

Ísíng anné kírídém.

Émdaggom 

Gené bírdung a:dung

Néiyé néngan ngansa:dung

Singi-gipuné pundung

Péiyi-péttang oi-ni:tom jé:dung

Asinsé jinsa:dung.

Do:míré ésaré dumdum démdung

Gumrag gumrag kekonélé gumrag

Gumrag gumrag kekonsé gumrag

Bornoi gumrag

Obonori gumrag

Dagdung gumrag

Daktok gumrag

Daktok ésaré sardung.

Doksiri দকচিৰি, জানুৱাৰী, ২০২৪