সম্পাদকীয়

 

GI TAG-LO ARDA:N MISINGKÉ ALAG MOJING

(Mising Handloom)

 Ohom mimo:sok ansí:réki:né mising mo:pínlokképé 2024 dítaksé airupé mé:yumsupénam dítakko. Sé dítag arango:lo annyikopé opínlok mala du:nam aro arém pa:to. Ako “Poyirnané agom kisa:pé mising ané agom” dokké GI (Geographical Indications) lo “Alag Mojing - alaglok sumnam (ege gasor) atta:r manggom alag ta:da:l”. Ohom mimo:lokkém kíkum 12 kopé dírbí kangga:ém GI Tag-é tolíkto. Odo ara:do ngolukké arda:né mising né:ng ommang alaglok sumnam alag mojing atta:ré GI Tag pa:namdé arorupé mé:yumsupénam lutatko.

   GI Tag-lo Mising alag mojing (Mising Handloom)-lo la:ténam atta:rkídí:dé Gadu, Gadu Galuk, Jinrég, Tongali Dumér, Gonro Ugon, Tapum Gasor, Ege - (Mosang, Gejíg, Tapum ege), Gero, Sori Potali atí atí:é.

Sé GI Tag-lo a:té:né atta:rkídí:sé mising du:téng alum du:ri-rísu-lo duyé lukanpé Dhemaji, Lokhimpur, Majuli, Jurhat, Tinsukia, Dibrugarh, Shibsagar, Gulaghat, Sunitpur odokké Arunachal Pradesh-lok Pub Siyang, Namoni Dibang Bheli dokké Luit mo:dum ara:lo.

  Misi:lok mike koje be:dam atta:r manggom alag mojing atta:ré aí kisa:pé aréko pa:sunamdé aipé mé:popénam agomé. Su:pak aí kisa:pé aréko pa:sula ngolukké arda:né mising mímbírlokképésin mé:popénamé kapilané su:pakkolokké sumnam atta:rkídí:dé mési:la kanggabnam dokké pu:po jarpomnamé bojeko jaryangkang.

Mising alag mojingém GI Tag-lo a:monam léga:pé nérkíkpé tarungém ru:bonédé “Human Welfare Association”-lok nébíng Dr. Rojoni Kant-bí. Golaghat mo:dumlok “Institute of Handicraft Development, Golaghat” émnam trustdokki “Assam Mising Handloom Products” aminlok GI Tag pa:nam léga:pé “Geographical Indications of Goods under GI Act of Intellectual Property Right”-lo gíbídné 26 oktubor 2022 dítagdo do:jigém bika. Édé agerdém gerboka GI Registration-lo ager gerra kinjo:né Dr. Rojoni Kant-bí.

   Mising Handloom manggom alag mojingém GI Tag-lo bérokpé ipínla:dopé NABARD (National Bank for Agriculture & Rural Development)-é idumsuka. Appíngém anka:la ka:mi-tadmigela “Assam Mising Handloom Products” kisapé aro tamkaném 30-03-2024 longkílo pa:to. Édé aro tamkandé 30-03-2024 lokké 25-10-2032 dítaglo:pé kíkum 8 dítakkopé du:yé.

Doksiri দকচিৰি, এপ্ৰিল, ২০২৪