NGO APONGÉM TÍNGÍR-SUTAG
Debanondo Pe:gu
Arí kama:né asísém éddíkoi tí:yén
Ajjouko aríko molusugel tí:po:pé
Gedopé,kampodopé manggom lí:dopé
Arí kané asísém tí:míloi a:ngé pítadag
Asinsok mé:nam agomém luli:namdém lula:dag
Ngo tíngírsutag
Édílai-lokkébo asinso guné ésarko dung
Yí:lenla:mal níkkeb-nígrebdag
Asinsém ansí:moné guné assé
Aki:so do:mírpé míra:la
Mé:po pédongém omodung.
No a:réng sa:néko
No gídíng bomnéko
No aín-murkong kanéko
Nok kosagdé sakpo:nammé
Nok tetkodé aín kungkeyé
Ngo appí:dém kangkumna dung.
Yumé-mangamílo pi:dumko takpai
Kémo-ma:yamílo a:lko gíppai.
Adi: di:té:to kumdangko danggel
Mukkang lédulo sarné ésarpé nom léngkansuppai.
Yokpagla du:né ma:nyíngko lékoda jarsa:dungku
Mopíd -la:ma:nam mimakko mé:pa:dungku
Yora:do ojíng ko:ko kéno:la kabnamko tapa:dung.
Édémbulum no okodém kindang.
Ngo apongém tí:tag,tíngírsudopé
Lupénam agomsém asinso yégla lé:lamang
Dé:lenné épuksé sékkaikol dénggab-daggom
Aíé satpaksulang
Ngok okkomsin kinsul lumang.
Doksiri দকচিৰি, নৱেম্বৰ, ২০২৫
No comments:
Post a Comment