YOKPAKKANG

 

YOKPAKKANG

                           Digen Taid

Longé lo:bungko kinsuma:pé gímanto

Síríng émna amír asígé míryatkang,

Ang-ké:sém ring-ka: sula kangkunammé 

Lí:po:sog génam doksiri:dé katomang.

Mé:pén pénma:pé méngaksuge:la

Kérang kétagdo malé malagém mala 

Lamku kéra:pé yaddubla matoném 

Doksiri abídé bínsodla ojersula dung. 

Aínarmanggom bí aínémpé unnékai

Murko:manggom murkongémpé inéko 

Tadog abídog pongkogdo apíko 

Lé:mo unkampé unjírígla dungai. 

Apírdém ringgo: ringgo:la mala:sin

Alag so:nyiké penggo:la ka:lasin

Pirtala unte:né apirdém mabektomang,

Longé to:ra:do ui ma:nyi:pé yokkang. 

Mo:di: di:lungé rongngam pésamkang 

Asinbo muglíng do:pidangkang, 

Síkpénam bélamésin du:pakkang

Asin mé:lodé émmumpé ipakkang.

Dogné tadog abídog bébélénna du:né 

Lounné apirdém ki:né na:né lé:suto

Mé:tér ka:tér suge:la matérskodo

Sikkong jungngakko ígyedla mépakto.

Yokkodo po:yub okumko mobidung 

Dong smo:so ríksukumanggom 

Dítag gítubdo takamé dagríksuyéku,

To:rí ri:lígla réngamé mé:patíyéku.

Doksiri দকচিৰি, নৱেম্বৰ, ২০২৫