ফাগুনৰ অপেক্ষাত
জগদীশ পাঠৰি
তোমাৰ সন্ধানী দুচকুত
ফাগুনে চুমুক দি যায়
কাণে কাণে কৈ যায় প্ৰেমৰ বতৰা
মৰহি যোৱা সপোনবোৰ
লহপহকৈ ঠন ধৰি উঠে পুন:
বুকূ ডাঠ কৰি কঁকালত টঙালী বান্ধিছো
আলি আয়ে লৃঙাংত ময়ো যাম তোমাৰ কাষলৈ
প্ৰাণ ভৰি উপভোগ কৰিম
গুমৰাগ চঃমান।
হৃদয়ৰ শুকান মৰুত
ফাগুনে আনিব সজীৱতা
সিঁচি দিব আশাৰ সঞ্চাৰ তাৰেই অপেক্ষাত ৰৈ আছো
প্ৰতিপল অনুপল অধীৰতাৰে।
হৃদয়ত গাঁজি ৰখা গোপন কথাবোৰ
আটি আটি বান্ধি ৰখা বুকুৰ মৰমবোৰ
উৰুৱাই নিদিবাচোন উলাহত
চঞ্চল ফাগুনে উদঙাই দিব পাৰে
গোপনে সাঁচি ৰখা
তোমাৰ মোৰ অব্যক্ত বেদনাবোৰ।
Doksiri দকচিৰি, ফেব্ৰুৱাৰী, ২০২৬
No comments:
Post a Comment