Mising Agomsém Kapé Turmoyén

 Mising Agomsém Kapé Turyarmoyén

                                            ✍️Kalinath Pangging                                                                 Gogamukh

      Ohomla:Orunasol amo:lo réngam ngamla du:né Mising émsuné tani: ope:sok lubomsula du:nam agomsé “Mising Agomé”.

Lendo-a:do dokkébo Mising agomsém nappa:lok lubomsula du:nam agomkai.Sé Agom sokké abíg(script)é kamangai.Kinné-pa:né midum ékkélok daggurkila: Mising réngamké tolíkki gíbídné 1972 so:ndok 18 Epril longédo Sibsagorh mo:dumlok Dísangmukh amo:lo Mising Agom pu:po-jarpomonam léga:pé Mising Agom Kébang-ém ba:lento. Kinbínné Mibang(Expert Committee)ko 1974 so:ndo ba:len-ge:la édé miba:dém Mising Agom léga:pé abíkko ru:lendopé tolíkto.Édé kinbínné ope:dé me:lampé 1978 so:do appíng abígém ankangge:la Moyinsunam Ruman Abíg (Modified Roman Script)-dé Mising Abíg émna ru:lenla MAK ki:ni mibangém bia:to odokké Mising Agom Kébangké 1978 so:ndok Dhemaji amo:lok ba:nam Mirum kéba:do édé Ruman abígí:dém Mising Agom Abíg émna tolíkto.Lupé lumílo édé 1978 so:n dokképag Mising agomsokké aísuapé Abígé kakang. Édé abígí:dém ajjio:ko moyin-mojo:suge:la 1980  so:ndok Kherkotamukh-lok ba:nam MAK-lok Mirum Kéba:do nérkíkpé  aíké Mising Agom abíkki adnam-ponamém iropto.

Odok léduké adí kídí:do adné-poné ope:é Mising Agom abíkki adnam-ponamém ila siloké longéso:pé ibomla dung. Ohom migomém do:ri mola 1986 dokké 1991 so:ndo:pé pobug pogolo 230 kopé Mising Agom poyirnémsin bika.

Mising Agom Kébangé Mising Agom léga:pé bangkí bangkíné ager tarungém tolenla bangkí bangkí agerém gerbomna dung. Agomsém asin oné ope:é Mising agomlok adnam-ponamémsin ibomla dung.Mising Agom Kébang lottalokké Mising du:yangko do:lu:lok pobug pogolo Mising agomsém poyirnam agompé ( Medium of Instruction)pé ibitoika émna do:ri:ém moanna dung. Su:pakké anupé tolennam “National Education Policy,2020,(NEP,2029)do néma:pé imílo Mising agomsém pogolok poyirnam agompé tolígyepé émna ngolu toya:la dung.

Migomé tolígmílo Agom turnané bélamsé réyonpé gíyarbomyepé émna ménggotko kadung.Émdaggom ngoluk agomé,ngoluk gomugé, agomsém turyarmonam léga:pé ngolurung kéra:lokké daggursul agerém gerbompa:ye.No-ngo,Mising réngamé agomsém turmonamdém ima:mílo amme kapésin ngoluk agomsém turmola:ma.

    Adí lédulok gímínné agom bélamém anmi:yemílo,siloké longéso Mising agomsé aipé ngasod ara:lo turra du:namém ka:pa:dung. Mising Agom sorsa:né midumé pí:ramdung.Si:sang ope:é aíké Mising agomsém lupénamém lo:bagdung.Lujarlok kumda: da:la du:né abayang Misingé aíké Mising agomém mépagbomdung.Aropésin siloké longéso Mising agomsé ngasod pongkoglo turra dung.

Sé Agom ngasod ara:so ngoluk ané agom Misi:sém kapé turyarmoyén édém ngolu appíngé mangka:la ka:pa:ye.

Mising agomsém turyarra du:monam léga:pé sémpé ngolu luposula ka:la:do---

1.Mising agomsé ngok ané agomé,ngok dírbé,ngok kangkiné.’Sé kama:mílo ngo:sin kamang”- émna takam Misingé a:ng ara:lo ménggabbompa:ye.

                       ……Len-yarye…