Po:péké Ngok Do:lung

 Po:péké ngok do:lung

                                           ✍️Mg. Krishna Dole:

                                               Nolduwar, Majuli

Asinang onamé ngo

Sé Po:péké ngok dungko do:lung sém

Asinang onamé ngo

Agínpé ngok jonnam ajondém

Silo bérmi: bérmi:la bérra:sin

Bérbeg to:kumang ngok mé:namdém

Asinang onamé ngo

Sé po:péké Ngok dungko do:lung sém .

Ajonké dungko kekoné:lé

Ngokké dungko kekonsé

Pongkokdé biddung oríné a:né asíko

Émpila ruksu:tokumang po:péké ajonko

Asinang onamé ngo

Sé po:péké ngok dungko do:lung sém .

 Édé Pongkokdo bitné pu:mi asídé

Ngoluk bottané nga:so:dpé ikang

Édé pu:mi asídé

Ngok mé:bomsunam do:lungdém

Silo bidyudbomkang

Asinang onamé ngo

Sé Po:péké ngok dungko do:lung sém .

Sé am:so réngam mé:polo dudododém

Réngam kébang ba:do:do

Kétagai réngam ainam agomko

Kétagai réngam kampo:nam do:yingko

Asinang onamé ngo

Sé Po:péké ngok dungko do:lung sém .

Sé am:so lekeké ngok ajonbí

Gía:dagai ngokké okumpé ajoné émna

Silo sé am:so ajonbí ka:mang ké:raso

Silo sé am:so rongam pé:sammé

Silo ngok mé:nam ajonbí ka:mala

Asinang onamé ngo

Sé Po:péké ngok dungko do:lung sém .

So:éing ngok po:péké gumrag songko:dé

So:éing ngok po:péké agom kébang bangkodé

So:éing ngok po:péké yirman so:man mokodé

Mitpanmang ngo édé po:péké ajonmé

 Nga:so:d a:rado: Lékop lékorém kornamdém

Asinang onamé ngo

Sé po:péké ngok dungko do:lung sém.

Sé am:osé Kangkané

Sé gené mo:pí kayummé

Sé réngamsém Mising réngamsém

Nouéing Gílen bo:tagai

Nouéing kinsu: mo:tagai

Asinang onamé ngo

Sé po:péké ngok dungko do:lung sém.

Mising réngam írroi

Mising Agom írroi .