Ngoluk Do:lung

 NGOLUK DO:LUNG          

                                            Jiten Noro

                                              Lakhimpur

Aríg iné tani:ké miksilo mo:tag mo:lungém 

Metekang appunki punlubnamme'

Émdaggom édílo:sinéi lékko:kosin lukímang

Ngolum ru:namséi ru:murtag 

Édé méngkeb-mé:repkinma:né tani: kídí:dok 

Do:lungí:débo:yam ngoluk do:lu:dé.

 Lumbudnam guni a:m agag kídí:dém

Nok gíangko lamtédok kekon -kesakpé u:jer-u:yerla lola 

 lé:mílo

E:gé nurkíd-nurmadla be'labné lamtédo yuttabla otappé iyemílo

Kinna:bong éddí:bo:yam ngoluk do:lu:dé.

Kekon-kesakpé a:né rago ko:la

Bidné assém morasula

Dagné tungkub-pa:labné okumé 

Manggom tabí lédulo motauri talé:do 

Saggo:kí kumdon mola du:la

Gablígla yumé yumbungém darkoksula 

Sansumi:né amír kídí:do bedné galug géné

Opan pankuragné tani: kídí:dok do:lungí:dé:bo:yam ngoluk do:lu:dé.

Pu:mu asilo ngatung-ngabogla

Tí:nam asi batio:kosin pangko kama:pé

Argon bugné rilib ambín dola

Aki:rokkié bínsodgédopé turdoji

Éddí:bo:yam ngoluk do:lu:dé.

A:né pé:tumnam elektrik lounki

Bottén kumpanié ojor-omoré 

Odo a:né ru:yi tanié 

Lo:tungo:kosin pa:mang louném

Miglun péjabém amsan a:m bikampé binam

Do:lungí:dé:bo:yam ngoluk do:lu:dé.

Pogolok porin ommangé

Díu bondong pangé:la pu:mu asi bondongémsin pangko

Ambín,sira,tírpal,iskul beg,asi botolém

Migomé orkodo

Buluk ma:bomnam ma:nying léga:pé 

Luyum tadngaksula turra du:né tani: kídí:dok 

Do:lungí:dé:bo:yam ngoluk do:lu:dé.

Jetukang gené anné ara:lok

I: lí:bug turgo turlamlo

Yumé-ro: donam légango: 

Along beddopé ager gerra

Sila sila turra du:né tani:kídí:dok

Do:lungí:dé:bo:yam ngoluk do:lu:dé.

No gíyoka barikang adíso

Nok kangkano:né ga:ri:dé

Dukpí:ma:ye ngoluk lottaso

Ollu:lo sa:la génamém ko:yinsula

Manggom songko:né légolok sonna

Ngoluk karé okumdo sa:pa:yé 

Gísa:la pa:pélanga apeg-ayegém írpagné 

Tí:pon apong bati:ko 

Kapéné, namponé ko:n joha ílennané ki:pardé 

Punggo:la dung pu:mu asi lédulo.

Mibo bolí:né tani:kídí:dé

Nom boríksula:ma:la nok kinmango:pé mé:dír kabaném ban-yepé

No odolo mé:pola:yelang ?

Mé:pola:yelang no?

Édémyang no dígínso gílang

Líga:lok gumrag so:man mandolo 

Po:ro-nogjin apong ti':lai

Ampi purang apin dolai.

Kajé lékko:nam légodém turyar molai.