লেণ্ডস্কেপ

 লেণ্ডস্কেপ

গায়ত্ৰী দেৱী বৰঠাকুৰ 

তেজপুৰ

       

      ( এক)

কুৰি শতিকাটো 

উজ্জ্বল ৰং আৰু তীব্ৰ প্ৰকাশ ভংগীৰ 

ইপিঠি-সিপিঠি আছিলে 

এটি মুদ্ৰাৰ দৰে খলকনি 

সুক্ষ্ম ঝনঝননি

উজ্বলতাত 

তীব্ৰতাৰ অস্বাভাৱিক উপস্থিতি 

      (দুই)

চোৱাচোন মাটিছ 

মানুহ বোৰে কিছুমান কথা ক'ব লাগে বাবেই কৈ থাকে 

তুমি আৰু ডেৰেইন

হোনো 

বন্যপ্ৰাণী

কি কৰিবা টেমছ 

মাটিছো নিৰুপায় 

পাহৰি যোৱা সকলো 

পৰিহাসো 

দুখৰ সকলো স্মৃতি ধুই নিব পৰাকৈ 

শক্তিশালী সময় তোমালোকৰ পক্ষতে আছিল 

    (তিনি)

টেমছৰ বোঁৱতী পানীৰ শপতে 

যি ছবি আঁকিলে 

ডেৰেইনক 

হুইচলাৰ,মনেটৰ কান্ধত কান্ধ থ'ব পৰাকৈ 

ওখ কৰি তুলিলে 

ইউকেলিপটাচ তোমাৰ দুচকুত টেমছ*ৰ প্ৰতিচ্ছবি 

চহৰীয়া জীৱনৰ সজীৱ-সতেজ-সুতীক্ষ্ণ

সংমিশ্ৰণ 

ৰূপ-ৰস-গন্ধ

    (চাৰি)

ডেৰেইন

তুমি ঠিকেই কৰিছিলা 

ৰঙৰ উজ্জ্বলতা আৰু পৰম্পৰাগত শিল্প কৌশলেৰে

অথিৰ জীৱনৰ থিৰ যান্ত্ৰণাবোৰ 

ঢাকি থৈছিলা  

   (পাঁচ)

লেণ্ডস্কেপে

 আজিও ৰঙেৰেই মাতে 

গছবোৰে শিপাৰে খামোচে 

সেউজীয়াৰ শিপা -গভীৰতাৰে গছে ৰঙৰ পৃথিৱীক আৱৰে 

অভিজ্ঞতাৰ ৰঙে 

জীৱন বৃক্ষক যে আৰু অধিক তাত্পৰ্য্যপূৰ্ণ কৰি তোলে 

 কালজয়ী ছবি আঁকে 

(ছয়)

পূৰ্ণগ্ৰাস গ্ৰহণৰ দৰে 

চেজানে 

গালি থ'ব পৰা নাছিলে

তোমাৰ প্ৰাকৃতিক পৰিঘটনাৰাজি 

ঘনক দূৰৈত কিউবিজিম

   

(সাত)

   

বন্ধুত্বৰ গভীৰ এনাজৰীৰে মাটিছে 

তোমাক ভাল পাবলৈ শিকাইছিলে

  সুকুমাৰ পৃথিৱীৰ সুবিশাল ৰূপ গাঁঠি দিছিলে  

তোমাৰ হৃদয়-তুলিকাত  

ৰঙৰ সীমাহীন ব্যাখ্যাত তুমি 

চাতক হৈ পান কৰিছিলা 

অপাৰ ৰঙৰ অসীম অমিয়া সুধা

সৰ্বশেষত 

ডেৰেইন 

জীৱন মাৰ্চেলিৰ এক তৈলচিত্ৰ 

    এক লেণ্ডস্কেপ* ....

--------------------------------------

* এণ্ড্ৰে ডেৰেইনৰ শিল্পকৰ্ম লেণ্ডস্কেপৰ আধাৰত ।

* টেমছ নদী।