MISING AGOMSÉM KAPILA TURMOPÉ LAGIYEN

 MISING AGOMSÉM KAPILA TURMOPÉ LAGIYEN

Bhaigeswor Pogag

Agomlokké oko agerén? 

Agomlokké oko ageré émna taumílo sémpé luladag-“Agomdé lupo-tausunané mediamko.Agomé Tani:lok ménggé-suya:bannam mediamko.Éddo:mang,Agomé ngoluké réngamsém aibonané,Mising réngamsém gíbadbonané,Réngamké dírbí -dírlabém kangkinsunané.Agomé réngamké kangkinsunané bottané mediamko.Tani:ém civilize mopé odokké gyan buddhi kamopé pori-pogo kinpé kin-go lagidag.Édé kin-go lok lérí:déi agomdé.”

Agomlok léríng agerdé okodén?

Agomlok ame:pagné odokké lagiya:bannam agerdé okodén émna taumílo gompirlo luyinla:mang.Agomém oddar lagiya:dag émna lula:mang.Tani:é ané aki:lokké lendag me:lamdokké dong amo:sém mépagla ngatérsudodo:pé agomém lo:dípé lagidag.Luségla lumílo agomé Tani:lokké Mé:dír-mé:po,Pésonam,Dígnam-kinam,Ngilnam-kabnam,laginam lagima:nam,Aro-Ayatpé mé:nam,Mé:mursunam,Mé:yinsunam,Lomgésunam appídém lubisunané amanko.Sém bulum lusarsunapé agomém lagidag.Agom kamapé Tani: réngamko turra du:lamang.Agomé arang mé:namém lusarsuné.Agom kama:mílo turla du:la oko iyen?Agomé kama:mílo turnamdé longélok lo:tungé odokké aíké dírbí dírlabém ,aíké do:pín do:yingém,aíké yelod daglodém mé:paksunamé.Agomsé Tani: réngamké kangkinsunané bottapagné amandé na:néké lubonam agomsé.Sém siloké sí:sang gí:sané ko: ko:néng,porila du:né sí:sang kídaré lubomna du:ma:mílo odokké alla pola du:moma:mílo agomé turra du:maye.Agomé turra du:ma:mílo mo:píso Tani: opínko émna lubisulama:ye.Ngolu Mising anéké onamé émna lubsukko kama:ye.Agomsé kama:mílo ngolu Misingé émna ami tatkolo lubisupé annyi:supa:ye.Siloké sí:sangé yampoké Mising réngamsok opín jo:pongé.Nolu Mising agomsém poma:mílo,nolu Mising abíksém adma:mílo kapé Mising agomsé turra du:yen?

Agom ako turra du:pé édé agomdém adgappé lagiye.Édém adgappé abíkko lagiye.Édé adgabnam abígdém poriné kapé lagiye.Émpila agomém turmola lé:nam légapé abígém lagido.Agomkokki akon réngamlok Tani: ém akon réngamlok Tani:é lupomínsudo.Akonké laginamdém akoné kinbido.Agom kama:pé réngam ako unnotila:mang.Tani: réngamé kapé ré:balla gíduji odok lédu lédulo agomégom ré:badmíntíla gídung.Mo:píso lula lungabla:ma:pé agomé dung.Tani: lusuné símínsé luta lumasula agom lurobdokkébo ané agomki luposurébdo.Émpigela édé ané agom dokki angu réngamlo manggom angu mo:pí-mo:rumlo asin mé:ngkampé lukoksulamang.Odok légapé angu agomém poyirsupé idag.Édé angu agomdém poyir luyirsupé abígém lagidag.

To:dí ya:molo Tani:é aíké mé:lod daglod kídardém mo:si:la lé:nam légapé abígém malenpé ikang.Buluké lunam gomug-gombe: kídardém adgabnam légapé agod bíglu:la tadnam agomdém adgabla kinmodo.Appíng agomloi adgabnam légapé abígém lagido.Mising réngamké aíké abígé kamangai.Émpila Mising réngamésin abíkko lagikang.Odok légapé Do:nyi ka:poné,Po:lo ka:poné Mising réngamsok kinné pané abí:bulu abíg mago:nam légapé bojeko kélu kébangém ba:to.Me:lampé Ruman abíkkokki Mising agomsém adgabla lé:namém ibola su Mising agomsém pogo ponané agompé itobo.Sé abíng buluké allenbokunam Mising abíksém odokké nappang agomdokké adman agompé mosi:la lé:binamsém anu sí:sané ko: ko:néng kídarsé mo:sima:mílo sé:ko mosi:biyen?

Tani: réngam ako ainé opínpé batpé pogo kin-go ém lagidag.Édé pogo kin-godém monané lérí:déi agomsé.Agom kama:pé okodém poyen odokké okodém ad-yen?Gomlab,Bigyan(Kinbég),Pési ko:ré kinbég(Economics) kídardém lutégla pobug posa:dokké ila kole:j I:nibharsiti lo:pé agomém lagidag.Mo:píso Bigyan lokké ila agom bigyanlo:pé appíng léga:lo pensam pensamlo gobekona mo:tíla du:dag odokké anu anu gompirém la:settíla du:dag.Mising agomlo:sin anu anupé gompirém la:settíla dung.Édémpé gomnu la:settíla agomém mirémbodo.Mising agomsé:gom paríngé rí:bombomtíla dung.Sém no ngo mosi:ng ka:sing ma:mílo séko ka:si mosi:yen?Mipag Tani:dé nokké agomdém kapégom mosi:bimaye.

Agom kama:mílo adnam gomlabé kapésin lemnang.Ngolu aíké ommang kídarém ané agomém luyirpé lagiye.Ané agomém Kapila lagidon ko:kangém ajjau:lokkéboi lukaipé lagiye.Ané agomlok légí légalok aro do:yingém luyirpé lagiye.Oko réngamlo bím otagji,édé réngamdok agom,dírbí dírlab,yei-yesang,gílod daglod,dolod tí:lod kídardé bíkké amír ékér kídardém larbodo.Ané agomki ko:kangé aiyompé kinnado.Émpila anéké lusi mosi:la lé:binam Mising agomsém mosi:pé lagiye.Ané agomki ko:kangé pobug posa:dolo pomílo ko:kang aiyompé kinnadag.Édé agomdém mé:la Mo:di migomésin Bharot mo:rumso aí aíké ané agomki pobug posangko iskullo lékor angngoso:pé ané agomki poriladopé anu kin-go ayon-2020 émna la:lentung.Mising agomsimgom édé kin-go ayon ara:do langa:mopé Mising agomsém poriné lenpé lagiye.Lunné bojepé lagiye.Odopag migomé Mising agomsémgom édé ayon ara:do langaye.Mising agomsé anu kin-go ayon ara:do langamílo Mising mastorém pa:ye odokké migom ager okumlo:sin bojeko sakoriém Mising sí:sang gí:sané yame: mímbírésin pa:ye.Émpila Mising agomsém asin dígdanna appíngé porilai odokké allai,Mising agomsém mo:píso turra du:molai.