মাটি-কংকাল
ৰঞ্জিত ভট্টাচাৰ্য
খেতিয়কজনৰ কংকালটো পৰি আছে পথাৰৰ শুকান মাটি সাবটি
সৈনিকজনে কেকাই আছে আছে যুদ্ধভূমিৰ বুদ্ধক সাবটি,
মাছমৰীয়াজনৰ নাড়ী-ভুৰুবোৰ উপঙি আছে শান্ত নৈখন সাবটি
নৈপৰীয়া মানুহজনে উচুপি আছে হৈ উঠা মথাউৰিটো সাবটি
অমৰত্বৰ মিছা গানৰ সুৰ এটা ক'ত বাজি আছে!
প্ৰেমিকজন চটফটাই আছে নিজৰে উঁৱলি যোৱা শ সাবটি
প্ৰেমিকাজনীয়ে উচুপি আছে নিজৰে শোতোৰা পৰা ছাল সাবটি
অমৰত্বৰ মিছা গানৰ সুৰটো ক'ত বাজি আছে!
গান গাবলে' ভাল। বৰ ভাল।
সেইবাবে আমি গানকে গাওঁ।
সুৰ হেনো থাকি যাব।অসুৰ হেনো মৰি যাব!
আৰু সৌ আহি থকা দিনটোত-
গীতাৰ বজোৱা ল'ৰাটো মৰিব
সুৰটো হেনো থাকি যাব।
দীঘল চুলিৰ ওখ ল'ৰাটোযে। বৰ অমায়িক।
মাইনা নে কি আছিল নাম!
সুৰটো থাকি যাব!
আৰু সৌ আহি থকা দিনটোত-
দ মাটিত হালবোৱা ভদ্ৰেশ্বৰ কাই মৰিব।
ক'লাকে হটঙা মানুহটো,
গাঁৱৰ বছেৰেকীয়া ভাওনাত কৰ্ণৰ ভাও লৈছিল যে।
ভদ্ৰেশ্বৰ কাই।
সুৰটো থাকি যাব
সুৰটো!
সুৰৰ নেজত ধৰি চিয়ঁৰিম--মই তোমাক খুব ভালপাওঁ,
তোমাক , শৰীৰটোক নহয়।
তাৰে নেজত ধৰি চিয়ঁৰিব- সুৰ অমৰ।
অসুৰ শৰীৰ গুচি যাব।সুৰ থাকি যাব
আৰু সৌ আহি থকা দিনটোতে -
কথাবোৰ পাগুলি পাগুলি ঘৰলে' উভটি আহোতে তাৰ
হঠাৎ মানুহজনীলৈ মনত পৰিব।
মানুহজনীৰ মুখখন,মানুহজনীৰ চাৱনিটো,
মানুহজনীৰ হাঁহি,মানুহজনীৰ গালি।
তাই যদি মৰি থাকে তাৰ কি হ'ব?
মাটি-কংকাল!
No comments:
Post a Comment