Asin Bogréng

Tuniram Medak

Yumrang péttang do:lu:do

Karbug takar kardodo,

Oikoli kabnamém tatkolo

Mo:téng bogré:do:pé yumdípéi gídungai.

Takar appuné apir apirpé odagai

Otsurné ngok bogréng pokíso,

Muksub tadogém géné yumrangém

Rongngamdo kangaksul du:dungai.

Sarsu sarmun ésardo

Mo:téngké pétum pélin okumdo,

Sekkai tumbo mari ri:namém tadla

Kéngé réga:la dungai yumra:dé.

Mukkang opané panla

Dorrong gérgérné po:lomé toyan do:mírté.

Oikoli kapkolo írroilíngé ayiré:sin

Silo mo:téng té:po:pé gígéndung.

O:, ngok aipé mé:nam oikoli !

No gíladlangku,

Ngok rémago:né asin bogré:so,

Nok tí:líng kénongém

Pagong pago:la lékoda dolangku.