ভিৰ

অনুস্মিত‍া ফুকন

      বঙাইগাঁও

সূৰ্য নমাৰ লগেই লগেই আৰম্ভ হয়

পথৰ বুকুৰ ওপৰত 

চিৰপৰিচিত এক ভিৰ 

ফটা সপোনবোৰক সী দিবলৈ

উদং পেটত তৃপ্তি সানিবলৈ

ব্যস্ত হৈ পৰে 

সদাব্যস্ত পথবোৰ

আচলতে ভিৰবোৰ ভাল

মিছাবোৰক লুকুৱাবলৈ ।

ভিৰৰ মাজত সহজে নুশুনা হৈ যায়

উকা কপালে প্ৰতিপলে পোৱা কৰ্কশ মাতষাৰি

ভিৰৰ মাজত সহজে হেৰাই যায়

নিশাৰ ৰঙীণতাত ভদ্ৰতাৰ পোছাক সলাই পেলোৱা বেশধাৰী

বেলি লহিওৱাৰ পিছে পিছে

ভিৰবোৰো গতি সলায়

ফুটপাথত সপোন ৰচে

ঈশ্বৰ,আল্লা,গডক বিচাৰি

দুৱাৰদলিত ভিৰ কৰে।

আচলতে ভিৰবোৰত 

নিজক চিনিবলৈ ভাল

ভদ্ৰতাৰ মুখাখন খহি নপৰালৈকে

পিন্ধি থাকিবলৈ 

ভিৰবোৰেই ভাল ।