ALI A:YÉ LÍGANGÉM KAPILA LÍGGOTKAN?

 ALI A:YÉ LÍGANGÉM KAPILA LÍGGOTKAN?

                     Horish Dole:

     Misingé aíké ilod-gílodém kabo jibodopé adgabla lé:namé silosin pí:namko kama:da. Édémpé ikolo siloké Mising tanié kapila Lígang, Po:rag, Dobur, Taléng ui édémbulum idagji édém abí:ya:né ako annyiko kindaggom béjéyang kinma. 

     Do:yingkídí:dém kinpé mibu a:ba:lok kinpa:dag. Mibu a:bang lukankampé kapila Lígangém líggotpé ika:ji édém kéígbo atkantung...

     Mo:písém ru:len-pílen-ge:la Ru:né-Pínébí turné takamém turnané atí takamém bingaptungngai. Édé ara:dok tani:  ope:dé buluk turríngkampéi turpa:la mé:potéré katomangai. Lédupé bulu ibadé barko:la aí arang arangí:do akoné akoném ménggéma:pé irobla abíng -ame: kangkinmunsuma:pé odokké lumun-pamunsunamém  iropkang. Édémpé imunsunamo:dé pí:ma émna bulu mo:lungké taye:lo:sin irí-sinnyom irobbomkang. Édémpé inamkídí:dém anrasula:ma:la Abu Tani:bí édémbulum rotumka. Émpige:la bík agomém sé:kosin tattoma odokké bímdan aisí:ma:pédan luropkang. Bulu aso: aso:pé ibarbarko:la:dan irobnamdém ka:rasulama:la odokké mé:dír-mé:song béjéla Ko:jé Yanggo, Karsíng-Kartang Kongki-Ko:mang, Ésar-Pédong buluk appí:dé Ki:líng -Kangge:pé gípagamkang. Mo:píso Ésar-Pédo:bí kakuma:la Mo:písé mo:sanropkang.  Mo:sanné amo:do aríg-ísíngésin aitokuma. Turné takamé ngatung-ngabogla siya:bomkang. Édém ka:la du:né Abu Tani:bí édé ngasod appí:dém ka:ra:sula:ma:la do:yi:dém kíbige:la po:píngkémpé ai-kangkanpé turmoteikuka émna lubisukolo bí Ki:líng-Kangge:lok du:né Yí:ro-Ja:rokolo:pé gíto. Bí bík lédulo Ki:bomésin gíboto. Ki:bobí Abu Tani:ké o:nam ikiyai. Abu Tani:bí béjéko gítíla gídodo longékoném Ki:líng-Kangge:pé gípí:to. Bí Ki:líng -Kanggeké gesi geyomna, appun‌, apí-a:yé, pétta:-péyying édémbulum ka:la kangaksula oko légangé gítungaji édémsin kinsugéma:pé gínampé gítíla gíto. Ésar-pédongésin su:pag émmílo su:pag sardag- odag odokké odok léddu:do do:nyésin ka:dag. Kí:líng-Kangge:ké kangkaném ka:la kangaksula gítíla gíné Tani:mé lamkudokké bík gíbonam Ki:bobí léko bagémpé gag émna rapaglíkto. Bík édémpé rapaglígdodo:pag Tani:bí oko légangé gítungaji édém mé:pa:sulangkula tolo-bolopé bérgo:sula ka:to. Édémpé kanggo:sudodo bí Yí:ro-Ja:roké ukumdém aninoudo ka:pa:suto. Kangka:no:né ukum tunggé:do Yí:ro-Ja:ro, Kongki-Ko:mang, Ésar-Pédong bulum appí:dém ka:pa:suge:la  anguko méngko-mé:moko ménggo:ma:pé ukumdo:pé gía:to. Bík édémpé gía:namdém kangge:la lottadokkém Yí:ro-Ja:robí Tani:mé goksa:to. Tani:bí gía:dan-ge:la Yí:ro-Ja:rokolokké ila odok du:né appí:dém mo:písok ngasod do:yi:dém kíbisuto. Édém taddan-ge:lai Yí:ro-Ja:robí lusangkang- "Ngolu édé do:yingí:dém appíngé ru:su-pa:sula dungngai. No émmílo ngok ukumso du:po:to. Ngo do:yi:dém Do:nyi-Po:lokoto lupa:pongkapé." Agomdém ludan-ge:la Yí:ro-Ja:robí ukumdokké gílenna gíkang. Bí Do:nyi-Po:lo kolo:pé  gípíngge:la Ko:jeYanggo/Ki:né Na:né mé ríksuge:la mo:písok ngasod do:yingkídí:dém lungabbito. Édém tatpangge:la Ko:je-Yanggobí amni/amli pirnyiko la:len-ge:la Yí:ro-Ja:romé bilígge:kula édém kapiné ilodém ila lélíkkupénamméji édé appí:dém lungabbige:la mélíktoku. Édém bomnangkula Yí:ro-Ja:robí ukumpé pí:toku. Bí édémpé pí:dan-ge:kulai bím toya:la du:né Tani:mé agom appí:dém lungabbige:la Tani:bí mo:pípé gídokudodo okolai amni/amli:dém onyogmopéké émna Ki:boké yeru:do sí:lígbito. Édé longédokké iki: yerungé alumge:la araikang émna:sin lunamé kadung. 

     Abu Tani:bí amni:dém mé:podanna bompí:dange:kula Yí:ro-Ja:roké luyir lukamardémpé mo:písok tani: takamém gokkumsuge:la ai kangkanpé ilod-gílodém idanna amni:dém legotto. Édé longédo kapiné ilod-gílodém ila amni:dém legotkaji édémarpé silosin Ali A:yé Lígangém líggoddag. Odokké édé longédokkéi Ali A:yé Lígangém silopé líggottíla dung.  

     Édémpé ila Ali A:yé Lígangém líggotpé ikang.