ALI A:YE LÍGA:SO GÍLANGKA

 ALI A:YE LÍGA:SO GÍLANGKA

            Jiten Noro

Pu:mu assé lumbitnam a:m aríg gatsumtobo

Pétu-pe:redémsin yiksí:tobo

Lamté gíjernam aríg amongém mo:nula

Guni arígém mosa:du:bong

Dígín antégém ri:ya:sula 

Singi gipuné punsa:dung

Alang mala dénga:né péi-pétangé

Tíngírsula uru:sere:la ni:tom tomdung 

Buluk ni:tom tadla lígangé a:do

Ginmur po:loké lamkudo bígabla

Ko:néng kídaré taléng ékkamém nadung

Jongki panoiké naré:né ayang kísapé 

Taléng ékkamdo kunyé 

Bagabné ampi purang apiném

Oiséngbulu ta:dém pa:la

Sudngasuma:pé makungém suddung

Ri:bi gaséng, érkogé:lang pakkogém sumdung 

Mibu gaug, mosang egelo tamuli takarem kebdung

Yumdéng ayírdo ya:mé-mímbíré

Gumrag maksongém so:yírsudung

Líga:lang abu longé yumbu:do

Gumrag so:man ,lotta so:man,oini:tomki

Ngoluk do:lu:sé gumgumaila du:yé

Badyuksuge:l ramna du:né a:nédé

Opegla su yubla dung

Kamagé kadaggom Lamté bélamé píla dung

Ngoluk do:lu:so:pé gípé mé:domílo

Gílang ali a:ye lígang írdíso