ঘৰত কোনোবা আছেনে ?
অত্ৰেয়ী গোস্বামী
জপনা খুলি সোমাই যাওতেই
তগৰ এপাহ সৰি পৰিল,
বুটলি লৈ শুঙি চালোঁ
ভিতৰখন চেঁচা পৰি গ’ল৷
আগফালে দুৱাৰডাং
পিছফালে ধোবাংবাং
ঔ আই ই কি
এইটো দেখোন প্ৰকাণ্ড গাঁত৷
ভিতৰৰ শব্দবোৰ আপোনাআপুনি ওলাই আহিল,
মোৰ ভাল লাগিল
ইমান শীতল,ইমান নিৰ্জন
এয়া যেন পৰম আকাংক্ষিত চেনেহপুৰ৷
মোৰ দুচকু বন্ধ
মই গান্ধাৰী নহয়৷
লাহেকৈ মাত দিলো
ঘৰত কোনোবা আছেনে?
ক’ৰপৰা জানো আহিল সেই গুমগুমনি
যেন চুই গ’ল মোৰ আত্মা
অথচ মোৰ দুচকু বন্ধ
মই বুজিলো এতিয়া মই
পৃথিৱীৰ পৰা বিচ্ছিন্ন৷
পৃথিৱীখন ক্ৰমশঃ মোৰ বাবে
অচিনাকি হৈ পৰিছিল
মই মোৰ ভাৰ এৰি দি
উন্মুক্ত হ’ব খুজিছিলো৷
ইমান কোলাহল, ইমান ঈৰ্ষা
ইমান অবিৰত আক্ৰমণ!
মই মোক হেৰুৱাব খোজা নাছিলো
ভিৰৰ মাজত ঘৰ হেৰুৱাই অঘৰী হ’লো৷
ইয়াৰ পৰা বাহিৰৰ শব্দবোৰ নুশুনি
হয়তো কোনোবাই বাৰে বাৰে সুধিব
অথবা কোনেও কেতিয়াও নুসুধিব
ঘৰত কোনোবা আছেনে?
মোবাইলঃ ৯১০১৫৩৫৭৭৩
No comments:
Post a Comment